Wani jami’in Kwastam mai suna Abdulwahab Magaji, ana zargin ya harbi kansa ne da bindiga ƙirar Pump Action a gidansa da ke Rukunin Gidajen Farm Estate da ke layin Binta Street a Abuja.
Jaridar Punch ta ruwaito cewa iyalan marigayin mai muƙamin CSC da ke aiki a Abuja ne dai suka sanar da ’yansanda cewa ya harbi kansa da bindigarsa a gida.
Bayan isowar ’yansanda ne aka ɗauke shi jina-jina zuwa asibiti inda likita ya tabbatar da mutuwarsa.
An ba da gawar mamacin ga iyalansa, domin a yi mata jana’iza bisa Koyarwar addinin Musulunci.
KU KUMA KARANTA: ‘Yan sanda sun kama wani mutum bisa zargin kashe abokinsa da sace motarsa a Kano
Neptune Hausa ta tuntuɓi kakakin hukumar kwastam na ƙasa, Abdullahi Maiwada, inda ya tabbatar mana da faruwar lamarin, ya ce “an tabbatar da mutuwarsa, amma babu tabbacin ko shi ne ya kashe kansa, ko kuma kashe shi aka yi”. Sai dai ‘yansanda suna bincike don gano haƙiƙanin yadda ya mutu.
Wani abokin marigayin, mai suna Lawan Al-Amin Mohammed, ya tabbatar da rasuwar CSC Magaji, wanda ya bayyana a matsayin jajirtacce, mutumin kirki mai riƙon amana kuma mai taimakon jama’a a lokacin rayuwarsa.
