Iyalan wani sabon ango kana jami’in a rundunar sojin Najeriya, Kofur Saheed sun kasance cikin zulumi da juyayi yayin da wani ɗan sanda ya kashe shi a jihar Legas.
Rahotanni sun nuna cewa marigayin yana aiki ne da bataliya ta 174 na sojojin Najeriya da ke Odongunyan a Ikorodu kuma ya yi aure kwanan nan, kuma lamarin ya faru ne bayan wata hatsaniya da wasu jami’an ‘yan sanda a yankin.
Wasu soji da suka fusata da mutuwar abokin aikin nasu, sun yanke shawarar mayar da martani inda suka kai farmaki ofishin ‘yan sanda na Ogijo, inda jami’in ‘yan sandan tafi da gidanka da ake zargin ya kashe shi yake aiki.
Rahotonnin tashin hankali tsakanin jami’an ‘yan sanda da sojoji ya zama ruwan dare a Najeriya, kuma wannan lamari na baya-bayan nan ya haifar da fushi da takaici a tsakanin ‘yan kasar.
Iyalan sojan da ya rasu yanzu haka suna neman a yi wa dan uwansu da suka rasa adalci a kuma yi musu adalci.
KU KUMA KARANTA:Kotu ta tasa keyar waɗanda ake zargi da kashe dangin tsohon ma’aikacin CBN da wasu a gidan yari
A wata hira da ɗan uwan sojan yayi da Sahara Reporters, ɗan uwan ya ce. “sojan ya yi aure watanni kaɗan da suka gabat, na yi magana da shi kwanan nan na ce masa ya kula da matarsa. Abin bakin ciki ne da tashin hankali yadda aka kashe shi.
“Ya kasance mai ban dariya da kulawa, yana zaune a Gbagada kuma mutane da yawa suna ƙaunar shi, dole ne a gurfanar da ɗan sandan da ya yi kisan” inji shi
Rahotannin sun ce gwamnatin Najeriya ta kaddamar da bincike kan lamarin kuma tana daukarsa da gaske.
Ana sa ran za a gurfanar da waɗanda suka aikata wannan aika-aika a gaban kuliya, sannan kuma a ɗauki matakin hana afkuwar irin wannan bala’i a nan gaba.
Lamarin dai ya haifar da zazzafar muhawara a Najeriya game da alakar ‘yan sanda da sojoji, inda mutane da dama ke son kawo karshen tashin hankalin da ke tsakanin bangarorin biyu.
Leave a Reply