‘Yan Shi’a aka fi kashe wa a Najeriya, ba Kiristoci ba – Kayode
Tsohon Ministan Sufuri a Najeriya, Femi-Fani Kayode, ya ce abin takaici ne yadda ake mantawa da manyan laifukan da suka faru a Najeriya cikin shekaru 20 da suka gabata, musamman kisan kiyashin da aka yi wa ƴan Shi’a a Zariya a 2015, wanda aka kashe sama da mutane 1,000 a rana guda a ƙarƙashin gwamnatin Buhari. Ya ce wannan shi ne mafi girman hari da rundunar tsaro ta yi kai tsaye kan ’yan ƙasa saboda addininsu.
Ya bayyana cewa, duk da cewa an yi kisan Kiristoci a ƙasar musamman a Kaduna a 2016, waɗannan hare-haren ba gwamnati ta aikata su ba, illa miyagun kungiyoyi da ke kashe Muslimai da Kiristoci gaba ɗaya. A cewarsa, waɗannan miyagu sun kashe malamai da shugabannin addini da dama ciki har da Sheikh Jafar Adam da Sheikh Albani Zariya.
KU KUMA KARANTA: Ku guji yin rikici da sunan addini — Shaikh Zakzaky ya faɗa wa Musulmi da Kiristoci da suka kai masa ziyara a Abuja
Ya ƙara da cewa rikicin addini da kabilanci a Najeriya ya shafi kowa – Musulmi da Kirista – inda misalai da dama suka haɗa da kashe Gideon Akaluka a 1996, Deborah Samuel Yakubu a 2022, da kuma Bridget Agbahime a 2016. Ya ce waɗannan laifuka ayyukan mummunan tawaye ne, ba tsarin gwamnati ko wani addini ba.
KU KUMA KARANTA: Jami’an tsaro sun hana mu gawarwakin ‘yan’uwanmu da Sojoji suka kashe a Abuja – Mabiya Shi’a
A ƙarshe, ya jaddada cewa babu wata al’umma guda da ake yi wa ƙalubale kaɗai, domin dukkan ‘yan Najeriya na fama da hare-haren miyagu da kungiyoyin ta’addanci da ba su wakiltar addini ko kabila. Ya ce abin da ake bukata shi ne adalci, gaskiya da gyara domin kare rayukan jama’a ba tare da son zuciya ba.
