Daga Ibraheem El-Tafseer
Mai bai wa shugaban Najeriya Bola Tinubu shawara kan yaɗa labarai, Bayo Onanuga ya ce shugaban ƙasar ba shi da aniyar ɗauke babban birnin tarayyar ƙasar daga Abuja zuwa Legas.
A wata sanarwa da ya wallafa a shafinsa na X (twitter), ranar Laraba, Onanuga ya ce masu yaɗa jita-jita ne ke yaɗa maganar domin jan hankalin al’umma gare su.
Wannan na zuwa ne bayan matakin da gwamnatin tarayyar ƙasar ta ɗauka na mayar da wasu ɓangarori na Babban bankin Najeriya da kuma Hukumar kula da filayen jiragen sama na ƙasar zuwa Legas, daga Abuja.
Lamarin da ya janyo ƙorafi da ƙiraye-ƙiraye daga wasu ƙungiyoyi na wasu ɓangarorin ƙasar, inda suka yi zargin cewa tamkar wani mataki ne aiwatar da wata ‘manufa ta daban.’
KU KUMA KARANTA: Gwamnatin Najeriya za ta mayar da shalkwatar hukumar jiragen sama zuwa Legas
Onanuga ya ce matakin mayar da wani sashi na ma’aikatar FAAN bai kamata ya ja hankalin mutane da yawa ba saboda jihar Legas ita ce cibiyar kasuwanci kuma cibiyar sufurin jiragen sama a Najeriya saboda haka ya ce har yanzu FAAN za ta ci gaba da kasancewa a Abuja.
“Akwai ma’aikatu da yawa da ba a Abuja suke ba dangane da aikinsu kamar NIMASA da take Legas. Haka kuma NPA da kuma hukumar kula da sufurin ruwa (NIWA) da ke Lokoja.’
Sanarwar dai ta ƙara da cewa bai kamata a siyasantar da lamurran gwamnati ba.
