A cikin kwanaki 10 mahara sun sace sama da mutum 10 a yankunan.
Alfijir labarai ta rawaito an sace tsohon Shugaban ƙaramar hukumar Yorro ta jihar Taraba, Mista Ishaya Dimas Dila tare da wasu mutum 10.
An sace tsohon shugaban ƙaramar hukumar ne da wasu mutane biyu a ƙauyen Dila da ke ƙaramar hukumar a ranar Lahadi.
KU KUMA KARANTA: ‘Yan bindiga sun sace manoma 11 a Abuja
Kazalika, ’yan bindiga sun harbe mutum biyu a ƙauyen Kunini da ke ƙaramar hukumar Lau.
Aminiya ta gano cewa an harbe mutanen biyu ne sakamakon turjiyar da suka yi wa ’yan bindigar.
Maharan sun kuma sake yin awon gaba da mutum takwas a ƙauyen Kunini duk a ranar Lahadi.
Bincike ya nuna cewa a cikin kwanaki 10 da suka gabata an sace mutane sama da 40 a ƙauyukan Dila, Pupule, Maraban Kunini da kuma Kunini da ke ƙananan hukumomin Lau da Yorro.
Kakakin ’yan sandan Jihar Taraba, SP Usman Abdullahi, ba a samu damar jin ta bakinsa ba game da lamarin.
