Wata Kotun Majistare da ke zamanta a jihar Enugu ta tasa ƙeyar wani tsoho mai shekaru 70, Anthony Mgbe zuwa gidan yari bisa zargin laifin kashe wata yarinya ‘yar shekara 15.
Wanda aka kashen mai suna Uchechukwu Onwuzuru, wanda aka ce kurma ce kuma bebiya, ta zubar da jini har ta mutu bayan da wanda ake zargin ya yi mata fyaɗe.
KU KUMA KARANTA: An yi wa budurwar da ta yi tatil da giya fyaɗe a Ogun
Tsohon ya fito daga Umuagu, ƙaramar hukumar Inyi Oji-River a jihar, an kama shi ne a kan tuhume-tuhume biyu da ’yan sanda suka yi masa.
Bisa la’akari da girman laifin, kotun majistare ta ƙi amincewa da bukatar neman belin tsohon ta kuma ɗage ci gaba da sauraron ƙarar har zuwa ranar 22 ga watan Nuwamba, 2023.
