Gwamnatin Najeriya ta kwaso ‘yan Najeriya 112 da suka maƙale daga ƙasar Libya

A ranar talata ne gwamnatin tarayya tare da haɗin gwiwar hukumar kula da ‘yan cirani ta duniya (IOM), suka kwaso wasu ‘yan Najeriya 112 da suka maƙale daga Tripoli babban birnin ƙasar Libya.

Ambasada Kabiru Musa, mai kula da ofishin jakadancin Najeriya a Libya, Kabiru Musa ne ya bayyana hakan a wata sanarwa da ya rabawa kamfanin dillancin labarai na Najeriya (NAN) a ranar Talata a Abuja.

Musa ya ce, ci gaba da gudanar da aikin kwashe na raɗin kan wani ɓangare ne na ƙoƙarin Gwamnatin Tarayya na ganin cewa babu ɗaya daga cikin ‘yan ƙasar da ya maƙale a kasashen waje.

KU KUMA KARANTA: Ɗaliban Najeriya a Sudan sun nemi a kwaso su daga ƙasar

Ya ce ana sa ran waɗanda aka kwashe za su isa filin jirgin saman Murtala Mohammed da ke Legas a yammacin ranar talata.

“Gwamnatin tarayya ta hannun tawagarta a Libya ta ɗauki nauyin kwashe wasu ‘yan Najeriya 112 da suka maƙale daga babban birnin Tripoli.

“Waɗanda aka kwashe sun haɗa da maza 55, mata 47, yara shida da jarirai huɗu.

“Sun tashi daga filin jirgin sama na Mitiga International Airport, Tripoli a cikin jirgin haya mai lamba UZ01890 da ƙarfe 13.30 na gida kuma ana sa ran isa filin jirgin saman Murtala Mohammed, Legas a ranar,” in ji shi.

A cewarsa, wannan shi ne jigilar kwashe ‘yan Najeriya na shida a bana, inda aka yi nasarar kwashe ‘yan Najeriya kusan 5,000 daga ƙasar Libya.

“Wannan aiki ne na son rai, kuma muddin ‘yan ƙasar na son komawa gida, gwamnati za ta ci gaba da sauke nauyin da ke kanta na mayar da su gida lafiya.

Musa ya ce “Muna godiya ga hukumar ta IOM da hukumomin Libya bisa goyon bayan da suka bayar.”

Kamfanin Dillancin Labaran Najeriya ya bayar da rahoton cewa, a matsayin ƙasar da ke kan hanyar zuwa Turai, an bayar da rahoton cewa dubunnan ‘yan Najeriya sun maƙale a Libya sakamakon safarar mutane, kuma suna fuskantar muguwar wahala a hannun masu safararsu a ƙasar ta Arewacin Amurka.