‘Yan bindiga sun kashe manoma tara a Kaduna

‘Yan bindiga sun kashe aƙalla manoma tara a Unguwar Danko kusa da ƙauyen Dogon Dawa a yankin Birnin Gwari a Jihar Kaduna, kamar yadda jaridar Daily Trust ta ruwaito.

A cewar jaridar, lamarin ya faru ne da yammacin ranar Asabar a lokacin da waɗanda abin ya shafa ke aiki a gonakinsu.

Mazauna yankin sun ce ‘yan bindigar sun yi awon gaba da wasu manoma kusan uku zuwa wani wuri da ba a san ko a ina ba ne.

KU KUMA KARANTA: ‘Yan bindiga sun kai hari a jami’ar Filato – Jami’a

Zaɓaɓɓen memba mai wakiltar mazaɓar Kakangi, Yahaya Musa, ya tabbatar da faruwar lamarin, inda ya ce duk waɗanda aka kashe manoma ne, kuma waɗanda suka samu raunukan harbin bindiga an garzaya da su asibiti domin yi musu magani.