Hukumar zaɓe mai zaman kanta ta ƙasa, INEC, ta ce Kwamishinan zaɓe na Adamawa da aka dakatar, (REC) Yunusa Ari, ya ɓace ɓat ba a san inda yake ba.
Kakakin hukumar ta INEC, Festus Okoye, ne ya bayyana hakan yayin wata tattaunawa da aka yi da shi a gidan talabijin na Channels a ranar Juma’a.
A cewar Mista Okoye, REC ɗin bai mayar da ƙiraye-ƙirayen da ake a layin sa ba, kuma bai karrama gayyatar da aka aika masa ya bayyana a hedikwatar hukumar ba.
Ya ce: “Ba mu san inda yake ba, domin bayan faruwar wannan lamari, hukumar ta rubuta masa takarda kuma ta ƙira shi a waya. Ko ɗaya daga cikin wayar bai dawo da ƙiran ba, bai taɓa amsa kiran ba.
KU KUMA KARANTA: INEC ta bayyana Gwamna Fintiri a matsayin wanda ya lashe zaɓen gwamnan Adamawa
“Mun tambaye shi ya kai rahoto ga hukumar ranar Lahadi, ba mu gan shi ba; mun nemi ya kawo rahoto ranar Litinin, ba mu gan shi ba. Don haka har zuwa yanzu, bai bayar da rahoto ba, kuma ba mu san inda yake ba.”
Da aka tambaye shi ko hukumar za ta bayyana neman sa, Mista Okoye ya ce hakan yana hannun ‘yan sandan Najeriya. “To, wannan yana hanun ‘yan sandan Najeriya.
Idan har suna ganin ana buƙatar kasancewar sa a yayin bincike kuma ba a same shi ba, haƙƙi ne da kuma haƙƙi a kansu su bayyana ana neman sa,” in ji Mista Okoye.
Kwamishinan na ƙasa ya ƙara da cewa alƙalan zaɓen sun samu amsa daga babban sufeton ‘yan sandan ƙasar cewa ya fara aikin gurfanar da REC mai cike da cece-kuce.
“Mun rubutawa babban sufeton ‘yan sanda da sakataren gwamnatin tarayya. Mun samu amsa daga babban sufeton ‘yan sandan ƙasar kuma tuni suka fara bincike.
“A fahimtata ita ce, da zarar Sufeto Janar na ‘yan sanda ya kammala binciken da ya shafi hukumar ta REC da duk wani mutum da ke da hannu a ciki, kuma an kafa wata shari’a ta farko a kan hukumar, za a gabatar da fayil ɗin ga hukumar, kuma hukumar zai fara tuhumar REC,” ya ƙara da cewa.
