Ɗan Majalisar Wakilai ya yi wa ‘yarsa kyautar mota don murnar kammala karatun sakandire
Mamba mai wakiltar mazaɓar Pankshin/Kanke/Kanam, Yusuf Gagdi, ya baiwa ‘yarsa kyautar dalleliyar mota ƙirar Lexus RX, crossover SUV, domin murnar kammala karatun sakandire tare da samun maki mai kyau a jarrabawarta ta shiga jami’a, UTME.
‘Yar ta sa mai suna Aisha Gadgi ta kammala karatunta a makarantar Lead British International School Abuja ranar Asabar.
Wani shahararre a Facebook, Saminu Maigoro, ya wallafa hotunan matashiyar tare da mahaifinta, suna baje kolin motar ta alfarma.
“Ina taya Aisha Yusuf Gagdi murnar kammala karatunki a makarantar Lead British International School Abuja. Allah Ya sa hakan ya zama mafarin ci gaban ki a rayuwa.
KU KUMA KARANTA: Gwamna Abba ya raba wa ƙananan manoma kyautar takin zamani
“Don murnar kammala karatun ta da kuma rawar da ta taka a JAMB, mahaifinta ya ba ta mamaki da kyautar mota,” in ji Mista Maigoro.
Sai dai kuma kyautar ta janyo cecekuce a shafukan sadarwa, inda wasu su ke goyon bayan hakan, wasu kuma su ke alla-wadai duba da matsin rayuwa da ƴan Najeriya ke ciki.
