Labarai
‘Yan sanda sun daƙile harin ‘yan bindiga a ofishin ‘yan sanda da masallaci a Zamfara
Rundunar ‘yan sandan jihar Zamfara ta ce jami’anta sun fatattaki ‘yan bindiga da suka kai hari ofishin ‘yan sanda na yankin ƙaramar hukumar Zurmi a jihar.
Rundunar ta ce ta kuma kama wata mata mai shekaru 35 da ake zargi da bayar da bayanai.
Jami’in hulɗa da jama’a na rundunar ‘yan sandan, ASP Yazid Abubakar ya bayyana hakan a ranar Juma’a a wani taron manema labarai a Gusau.
Mista Abubakar ya ce jami’an ‘yan sandan da ke aiki a ofishin ‘yan sandan sun yi aiki ne bisa sahihin bayanan sirri na cewa wasu gungun ‘yan bindiga na shirin kai harin.
“Jami’an ‘yan sanda sun haɗa kai, suka tunkari ‘yan bindigar tare da yin artabu da su da bindiga wanda ya ɗauki tsawon sa’o’i ana gwabzawa.
KU KUMA KARANTA: Sojojin Najeriya suna da karfin daƙile tayar da ƙayar baya – COAS
“Sakamakon haka, an kashe ɗaya daga cikin ‘yan bindigar yayin da sauran suka tsere zuwa cikin daji suna zubar da jini a kan hanyarsu saboda raunukan da suka samu.
“Binciken da ‘yan sanda suka yi bayan faruwar lamarin, sun kama wata mata ‘yar shekara 35 da ake zargin mai ba da labari ce daga ƙauyen Rukudawa.
“Waɗanda ake zargin ta amsa cewa tana aiki da ɗan bindiga Ɗankarami Gwaska a matsayin mai ba shi labarin kuma ta ba ta aikin sa ido a ofisoshin ‘yan sanda.
“An ƙwato wayar hannu guda biyu ɗauke da lambobin wayar ‘yan fashi a hannunta,” in ji Mista Abubakar.
“A ranar 28 ga watan Yuli ne ‘yan sanda da ke aiki tare da 34 PMF, waɗanda aka tura yankin Magarya da ke ƙaramar hukumar Zurmi, sun yi aiki da rahoton leƙen asirin cewa wasu da ake zargin ‘yan bindiga ne na kan hanyarsu ta kai wa Musulmai hari a lokacin Sallar Juma’a a ƙauyen Kwata da ke gundumar Magarya.
“Jami’an ‘yan sanda sun tunkare su inda suka yi nasarar daƙile harin, ‘yan bindigar sun tsere zuwa cikin daji.
“Bindigu AK47 guda biyu, alburusai 7.62 harsashi huɗu da kuma babur Bajaj a wurin da lamarin ya faru, yayin da rundunar ta ci gaba da bin sawun waɗanda ake zargin da zummar kama su tare da gurfanar da su gaban ƙuliya.
“A ranar 27 ga watan Yuli da misalin ƙarfe 13:30 na safe, rundunar ‘yan sandan da ke yankin Gusau ta gudanar da bincike kan bayanan sirri da suka kai ga kama wasu da ake zargin ‘yan bindiga ne da masu garkuwa da mutane da suka addabi yankin Saminaka da ke cikin garin Gusau,” in ji kakakin rundunar.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: An kama ‘yan sanda, FRSC, LASTMA da ‘yan daba 14 bisa laifin karɓar kuɗi ba bisa ƙa’ida ba | Neptune Prime Hausa