Labarai
‘Yan Najeriya miliyan 11 ne ke samun wutar lantarki – NBS
Adadin masu amfani da wutar lantarki ya ƙaru da 200,000 daga miliyan 11.27 a rubu’in farko na shekarar 2023 zuwa miliyan 11.47 a rubu na biyu na shekara.
Hukumar Ƙididdiga ta Ƙasa, (NBS), ta bayyana a cikin rahotonta na wutar lantarkin Najeriya na kashi na biyu na shekarar 2023 da aka fitar a Abuja ranar Juma’a cewa ƙarin ya kai kashi 1.84 cikin ɗari.
Rahoton ya mayar da hankali ne kan lissafin makamashi, kuɗaɗen shiga da ake samu, da kuma abokan cinikin kamfanonin rarraba wutar lantarki a lokacin da ake nazari.
Ya bayyana cewa a duk shekara adadin masu amfani da wutar lantarki ya ƙaru da kashi 6.17 a kashi na biyu na shekarar 2023 daga miliyan 10.81 da aka ruwaito a daidai lokacin a shekarar 2022.
Ya ƙara da cewa, a cikin kwata na biyu na shekarar 2023, yawan abokan hulɗar mitoci ya kai miliyan 5.47 daga miliyan 5.31 da aka rubuta a rubu’in farko na shekarar, wanda ya ƙaru da kashi 3.10 cikin ɗari.
KU KUMA KARANTA: Majalisar Bauchi ta buƙaci da a gyara na’urorin lantarki da suka lalace
“A duk shekara, wannan adadi ya ƙaru da kashi 10.40 cikin 100 daga adadin miliyan 4.96 da aka ruwaito a kwata na biyu na 2022,” in ji NBS.
Hakazalika, ƙiyasin abokan cinikin wutar lantarki sun kai miliyan shida a kashi na biyu na shekarar 2023, wanda ya nuna ƙaruwar kashi 0.72 cikin ɗari sama da masu amfani da wutar lantarki miliyan 5.96 da aka samu a rubu’in farko na shekarar.
Dangane da shekara-shekara, ƙiyasin abokan ciniki sun ƙaru da kashi 2.58 a cikin kwata na biyu na 2023 daga miliyan 5.85 da aka yi rikodin a daidai lokacin a cikin 2022.
NBS ta kuma bayyana cewa, kamfanonin rarraba wutar lantarki sun tara kuɗaɗen shiga na Naira biliyan 263.08 a kashi na biyu na shekarar 2023, adadin da ya ƙaru fiye da Naira biliyan 247.33 da suka tara a rubu’in farko.
Ya ƙara da cewa a duk shekara, kuɗaɗen shiga da aka tara sun ƙaru da kashi 39.63 bisa ɗari sama da Naira biliyan 188.41 da aka tara a rubu’i na biyu na shekarar 2022.
Ya bayyana cewa wutar lantarki ta ƙaru zuwa 5,909 (Gwh) a rubu na biyu na shekarar 2023 daga 5,851 (Gwh) da aka samu a rubu’in farko na shekarar.
NBS ta ƙara da cewa a duk shekara ana samun ƙaruwar wutar lantarki da kashi 13.06 a kashi na biyu na shekarar 2023 idan aka kwatanta da 5,226 (Gwh) da aka ruwaito a rubu na biyu na 2022.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano