Kimanin mutane 37 ne rahotanni suka ce an kashe tare da jikkata wasu da dama a hare-haren da aka kai kan wasu al’ummomi uku a ƙaramar hukumar Tangaza ta jihar Sakkwato bisa zarginsu da ƙin biyan kuɗin ‘yan ta’addan.
Majiyoyi daga ɗaya daga cikin al’ummar sun ce ‘yan ta’addan sun kuma tarwatsa masu tausaya wa waɗanda suka zo yin jana’izar marigayin.
A cewar rahoton, al’ummomin da aka kai harin sun haɗa da Raka, Raka-Dutse, da Filin Gawa.
Shaidu sun shaida wa jaridar cewa ‘yan bindigar sun kai hari a yankunan da yammacin ranar Asabar.
Tsohon shugaban yankin, Bashar Kalenjeni ya ce an kashe mutane 18 a Raka, 17 a Filin Gawa, biyu kuma a Raka-Dutse.
“Mun so mu binne su da dare, amma ‘yan fashin sun dawo suka tarwatsa mu. Kamar dai a safiyar yau, waɗanda suka mutu suna nan ba a binne su ba,” in ji Mista Kalenjeni.
KU KUMA KARANTA: ‘Yan bindiga sun kai hari kan tawagar motocin gwamnan Kogi Yahaya Bello, da yawa sun jikkata
A cewarsa, “laifi” na mutanen ƙauyen shi ne ƙin biyan harajin da aka sanya wa al’ummominsu.
“’Yan bindigar sun sanya haraji a kan al’ummominsu, wanda ke nufin su ɗauki matakin nan take, tare da hukunta mazauna kan abin da za su yi da kuma kada su yi..
“Amma mutanen ƙauyen sun ƙi yarda, saboda haka ne suka far musu, inda suka kashe mutane 37, yayin da wasu da dama suka samu raunuka daban-daban na harbin bindiga, kuma a halin yanzu suna samun kulawa a babban asibitin Gwadabawa.
“Akwai wasu da har yanzu ba a san inda suke ba.
“A yanzu haka muna jiran jami’an tsaro su kai mu ƙauyuka domin binne waɗanda suka mutu,” ya ƙara da cewa.
Da aka tuntuɓi Kakakin Rundunar ’Yan sandan Jihar Sakkwato, Ahmad Rufa’i, ya ce bai san da harin ba.
Leave a Reply