Rundunar ‘yan sandan jihar Bauchi ta cafke wata mata, mai suna Amina Guguwa mai shekara 50 da haihuwa bisa zargin kashe uwargidanta mai suna Amina Koli mai shekaru 60 a duniya.
Kakakin ‘yan sandan jihar, SP Ahmad Mohammed Wakil, a wata sanarwa, ya ce lamarin ya faru ne a ƙauyen Miya da ke karamar hukumar Ganjuwa a jihar.
Bayanin da rundunar ‘yan sandan ta samu, ya nuna cewa a ranar 1 ga watan Junairun 2023, matar ta shaƙe abkiyar zaman aurenta ta har lahira sakamakon wata arangama da suka yi a tsakaninsu.
Wakil ya ce wanda ake zargin, kamar yadda rahoton ya bayyana, ta yi amfani da ƙarfi wajen shake wuyan marigayiyar da karfi, wanda a sakamakon haka ta mutu nan take.
KU KUMA KARANTA:Yadda matashi ya kashe kishiyar uwarsa da ƙanwarsa a Kano
SP Wakil ya ci gaba da cewa, “Da samun rahoton ne aka tura tawagar jami’an tsaro, inda suka garzaya wurin da lamarin ya faru, suka kwashe wanda aka kashe zuwa babban asibitin Ganjuwa domin a duba lafiyarta.
“Wani likita ne ya tabbatar da cewa ta mutu, kuma ana ci gaba da gudanar da bincike, bayan haka kuma za a gurfanar da wanda ake zargin a gaban kotu”
