Yadda mace mai ciki ta mutu a asibitin Kano sakamakon rashin takardun kuɗi

Wata mata mai juna biyu a Kano, Shema’u Sani Labaran, ta rasu a asibitin ƙwararru na Abdullahi Wase da aka fi sani da asibitin Nasarawa bisa zargin rashin kulawa da likitoci suka yi a sakamakon rashin samun ƙuɗi.

Mijin marigayiyar, Malam Bello Fancy, ya ce rasuwarta ta biyo bayan tsaikon da aka samu na canja wuri zuwa banki kuma likitocin ba su je wurin matarsa ​​ba kusan awa uku.

Idan za a iya tunawa, gwamnatin jihar Kano ta gargaɗi ‘yan kasuwa da manyan kantuna da sauran jama’a kan ƙin amincewa da tsofaffin takardun naira a jihar, inda ta ce za ta rufe tare da ƙwace lasisin duk wani kamfani na kasuwanci da aka samu a cikin wannan harka.

Sai dai an tattaro daga mazauna yankin cewa wasu cibiyoyi da suka haɗa da mallakar gwamnati, gidajen mai da kuma ‘yan kasuwa sun yi watsi da tsofaffin takardun kuɗi, ciki har da asibitocin da ke fama da matsalolin gaggawa.

Da yake zantawa da Freedom Radio, Malam Fancy, ya ce lokacin da matarsa za ta haihu ya kai matarsa ​​asibiti, amma asibitin ya ki amincewa da takardun kudinsa na tsohuwar naira, kuma ba shi da POS, don haka ne suka buƙaci ya saka kuɗin a asusunsu.

Ya ce duk da ya tura kuɗin kuma ya ci bashi, likitocin da ke bakin aiki ba su taba matarsa ​​ba saboda sun ce dole ne su ga alert a cikin asusun su, wanda ya ɗauki kusan sa’o’i uku.

“Matata ta shiga asibiti daga gidanmu, amma kafin a ba su sanarwar, zafin ya ninka kuma ta riga ta zubar da jini,duk da haka, ba su taɓa ta ba sai bayan sa’o’i uku da suka karɓi alat.

KU KUMA KARANTA:Gwamnatin Jigawa ta koka da ƙarancin kuɗi

“Bayan sun shigar da ita, sai suka gano cewa ba za ta iya haihuwa da kanta ba; cewa dole ne a yi mata tiyata, na yarda na biya kuɗin; har yanzu taransfa Haka kuma an yi jinkiri na ƙarin sa’o’i uku kafin su ga alat suka yi wa matata tiyata.

Abin mamaki, an fito da jaririn a mace, ita ma mahaifiyar ta rasu.

Sai dai babban daraktan asibitin, Dakta Rahila Garba, ta musanta zargin, inda ta ce ikirarin ba shine gaskiyar lamarin ba.

Sai dai wasu majinyata da ke asibitin sun tabbatar da faruwar lamarin, inda suka ce su ma sun gamu da matsala wajen biyan kuɗaɗen asibiti wanda ya kawo tsaikon ayyukan.

Da yake magana da manema labarai game da lamarin, kakakin hukumar kula da asibitocin jihar, Malam Ibrahim Abdullahi, ya ce sun samu labarin faruwar lamarin kuma za su fara bincike.

Ya ce, “Ba mu da tabbas kan musabbabin faruwar lamarin, mun samu bayanai ne kawai,amma mun fara bincike kan lamarin.”