Wani matashi ɗan shekara 28 mai suna Misbahu Salisu, ya kashe yarinyarsa mai kwana ɗaya da haihuwa, saboda yafi son ɗa namiji.
Hukumar Hisbah ta jihar Kano ta kama mutumin da ke zaune a Doka Baici a ƙaramar hukumar Tofa a ranar Juma’a.
Hukumar ta sanar da kama shi ne a cikin wata sanarwa da mataimakin kwamandan rundunar Operation Mujahid Aminudeen ya fitar a Kano.
Mista Aminudeen ya ce wanda ake zargin ya sanar da jami’an hukumar cewa ya bai wa jaririyar wani maganin kashe ƙwari, mai suna Otapiapia.
“Salisu ya kuma saka wa mahaifiyar jaririn mai suna Sa’ade, ƙwaya a kofin shayi mai ɗauke da maganin barci kafin ya aikata laifin.
KU KUMA KARANTA: Matashi ɗan shekara 17 ya kashe kansa a Bauchi
“Wanda ake zargin ya amsa laifinsa, inda ya ce ya fi son ɗa namiji amma matarsa ta haifi mace, wanda hakan ya sa ya kashe jaririyar,” in ji jami’in a cikin sanarwar.
Ya ce an miƙa wanda ake zargin ga ‘yan sanda domin gudanar da bincike da gurfanar da shi gaban ƙuliya.
