Ya kashe direba don ya ajiye mota a inda aka hana – ‘Yan sanda

Rundunar ‘yan sanda a jihar Legas ta ce ta kama wani mutum mai shekaru 41, Tolulope Olowu da laifin daɓa wa wani Pablo mai shekaru 33 wuƙa, ya mutu har Lahira a kan ya ajiye mota a kan titinsu.

Kakakin rundunar ‘yan sandan, Benjamin Hundeyin ya tabbatar wa kamfanin dillancin labarai na Najeriya afkuwar lamarin a ranar Lahadi. Mista Hundeyin, Sufeto na ‘yan sanda, ya ce lamarin ya faru ne a ranar Asabar da misalin ƙarfe 10:00 na dare a First Unity Estate, unguwar Badore a Ajah.

KU KUMA KARANTA: Sojoji sun kashe ‘yan bindiga bakwai, sun kama biyu a Zamfara

Ya ce an kai ƙarar lamarin ga ofishin ‘yan sanda na Langbasa ranar Lahadi da misalin ƙarfe 2:00 na safe.

Kakakin ya ce wanda ake zargin da marigayin mazauna titin Gbadamosi ne a cikin gidan. “Sun samu rashin fahimtar juna game da ajiye mota a kan titi.

“A cikin haka, ana zargin Tolulope ya daɓa wa Pablo wuƙa a ciki kuma ya mutu nan take. “Bisa rahoton, tawagogin jami’an bincike daga sashin sun ziyarci inda lamarin ya faru kuma suka ɗauki hoton.

“An ɗauke gawar kuma an ajiye ta a IDH Morgue, Yaba domin a tantance gawar,” in ji shi.

Mista Hundeyin ya ce an kama wanda ake zargin tare da nuna aikata laifuka, yayin da ake ci gaba da bincike.