Ganin yadda matsalolin tsaro suka ƙi ci, su ka ƙi cinyewa ya sa gwamnatin Najeriya shan alwashin sauya salo ta hanyar amfani da kimiyyar zamani wajen fuskantar ‘yan-bindiga da sauran masu laifuffuka don magance matsalar tsaro baki ɗaya.
Ministan tsaro a Najeriya, Malam Mohammad Badaru Abubakar wanda ya halarci taron bita ga malaman addinin Musulunci a garin Kaduna yau Talata ya ce nasara kan yaƙi da ‘yan-sari-ka-noƙe na da matuƙar wuya.

Maganar matsalar tsaro da tsadar rayuwa dai sune manyan batutuwan da majalissar ƙoli ta harkokin addinin Musulunci a Najeriya ta jawo hankalin kenan a wajen wannan taro, shi yasa ministan tsaron Najeriya Malam Mohammad Badaru Abubakar ya bayyana matakan da gwamnatin tarayya ke dauka don murƙushe matsalar baki ɗaya.

Ya ce yanzu da zaran ‘yan-bindiga sun fito kafin su gama kai hari su koma daji jami’an tsaro sun gama da su ta hanyar gano inda su ke da kuma ɗaukar matakin tarwatsasu.

To shin ko gwamnatin Najeriya za ta iya amfani da kimiyyar zamani don murƙushe matsalar tsaro kamar yadda wasu jami’an ta su ka dinga iƙirarin a baya, wannan ce tambayar da Muryar Amurka ta yi wa masanin harkokin tsaro Manjo Yahaya Shinko mai-ritaya wanda ya ce idan har da gaske gwamnatin tarayya za ta yi amfani da kimiyyar zamanin abu ne mai yiwuwa sai dai kuma ya ce gwamnatin ta daɗe ta na makamantan wadannan alƙawura ba tare da an gani a ƙasa ba.

KU KUMA KARANTA:’Yan fashi sun kai hari bankuna da ofishin ’yan sanda a Kogi

Kafin maganar amfani da kimiyyar zamani, gwamnatin tarayya ta sha alwashin ƙirƙiro ‘yan-sandan jihohi don tunkarar matsalolin tsaro a Najeriya, sai dai kuma babban sakataren majalissar ƙoli ta harkokin addinin Musulunci a Najeriya, Malam Nafi’u Baba Ahmed ya ce dole gwamnati ta taka a hankali.

Baba Ahmed ya ce gwamnoni za su iya amfani da ‘yan-sandan jihohi wajen musgunawa ‘yan-adawa da kuma karya ƙa’idojin aikin tsaron da ka iya zama matsala ga ƙasa.

Tuni dai ganin jan-ƙafar da ake ta samu kan kirkiro rundunar ‘yan-sandan jihohi ya sa wasu yankuna da kuma ɗaiɗaikun jihohin ƙirƙiro rundunonin da ke aikin agaza wa tsaro, sai dai duk da haka ba a daina samun matsalolin tsaron a waɗannan jihohi da kuma yankuna ba.

Wanda ya ƙirƙira manhajar ‘Kapo drive’ ya ziyarci ofishin jaridar Neptune Prime dake Abuja, inda ya gana da shugaban Neptune Prime, Dr. Hassan Gimba.

Neptune Hausa ta tattauna da ya ƙirƙiro manhajar ‘Kapo drive’, ga yadda tattaunawan ta kasance:

Neptune Hausa – Tarihin rayuwar ka

Muktar – Sunana Muktar Auwal, an haife ni a jihar Yobe, shekaruna 26. Nayi firamare da sakandare a garin Abuja da jihar Kano, nayi jami’ar El-Razi dake ƙasar Sudan, na karanci Ilimin Kasuwanci da Ilimin Lissafin Kuɗi.

Neptune Hausa – Menene manhajar Kapo drive?

Muktar – Manhaja ce da za ta sauƙaƙa tafiye-tafiye, da kuma farashi mai rahusa. Kuma muna so mu ga mun zarce sauran manhajar tafiye-tafiye, wanda ba na ƙasan nan bane, suna kuma chaji kashi 25 cikin 100, wannan ‘Kapo drive’ in na ɗan ƙasa ne kuma muna chaji kashi 10 cikin 100. Za mu rage matasa masu zaman banza, da samar musu da abin yi.

Neptune Hausa – Manhajar a duk Najeriya ce ta ke aiki?

Muktar – A yanzu a jihohi biyu ne, garin Abuja da jihar Kano. Amma muna sa ran a wasu jihohin nan ba da jimawa ba.

Neptune Hausa – Yanzu kamar motoci nawa kuke da su?

Muktar – Muna da motoci ɗari a yanzu, hamsin a garin Abuja, hamsin a jihar Kano. Amma muna sa ran ƙara motoci cikin wata uku da fara aiki. Kuma App ɗinmu ‘bridge’ ne wanda zai yi haɗa fasinjoji da direbobi. Wajen rajista akwai na fasinjoji da kuma na direbobi.

Neptune Hausa – Me ya jawo ra’ayin ka akan manhajar?

Muktar – Rashin abin yi ga matasa ne ya janyo ra’ayi na, da kuma rashin ilimin kimiyya da fasaha a jihohin arewa. Ina sa ran cire dubban mutane daga cikin wannan matsalar. Wannan manhajar zai samar da aikin yi ga mutum sama da dubu goma cikin wata uku.

KU KUMA KARANTA: Manhajar ‘Threads’ da yadda ake amfani da ita

Neptune Hausa – Yaushe za a fara anfani da manhajar?

Muktar – Za mu fara amfani da shi a garin Abuja a ranar 15 Disamba, 2023.
A jihar Kano kuma ranar 17 Disamba, 2023 da yardar Allah. Daga wannan ranar zaka sami manhajar a Play store, Apple store, IOS.

Neptune Hausa – Kana da masu ɗaukan nauyin wannan manhajar ne?

Muktar – Ni kaɗai ne, bani da wanda ke ɗaukan nauyin. Amma ina so in akwai masu ɗaukan nauyin, ina maraba da su.

Neptune Hausa – Me burin ka?

Muktar – Ina son na faɗaɗa wannan manhajar ta isa duk jihohin arewacin Najeriya. Da kuma buɗe iyakoki a duk jihohin.

Neptune Hausa – Akwai abubuwan da za mu tsammani nan gaba?

Muktar – Ƙwarai kuwa, ina sa ran ƙara motoci wanda zai dinga tafiye-tafiye daga gari zuwa gari. Da kawo bas na ɗaukan mutane dayawa.

Neptune Hausa – Daga ƙarshe me za ka ce?

Muktar – Ina godiya ga Allah da ya bani damar buɗe wannan manhajar, ina kuma kira ga matasa musamman ƴan arewa da kada su karaya a burikan su.

Neptune Hausa – Mungode da bamu lokacin ka.

Muktar – Ni ma nagode.

Daga Ibraheem El-Tafseer

MENENE GOOGLE DRIVE?
Google Drive wata ma’ajiya ce da kamfanin google suka tanadar wa duk wanda ya mallaki account ɗin ‘Gmail’ kuma kyauta ne. G-drive ya kan ba da damar ajiya na kimanin wurin ajiya (storage space) 15GB kuma ya tsare maka shi, wato ya ba da tsaro (security) ingantacce. Ya kan iya adana bayanai iri-iri, kama daga rubutu (document), murya (audio), hotuna (pictures) da kuma bidiyo (video).

YAYA GOOGLE DRIVE YAKE?
Mafi yawancin wayar hanu ƙirar (smartphones) tana zuwa da shi kuma kyauta yake a cikinta. Idan aka duba wayar da kyau cikin nutsuwa za a ga application ɗin me suna Drive kamar yadda yake a hoto.
Idan ba a samu ba, sai a sauke shi, wato a yi download daga google playstore, zai sauke shi cikin a wayarka. Sai a buɗe shi, za a ga waɗannan abubuwa;
Sune kamar haka:
1) Folder
2) Upload
3) Scan
4) Google Docs
4) Google Sheets
5) Google Slides

YAYA AKE AJIYA A GOOGLE DRIVE?
Yadda ake ajiya a google drive shi ne, da farko za ka buɗe upload, nan take zai buɗe maka local storage, wato abubuwan dake cikin wayarka (memory). Da zarar ya buɗe, sai a zaɓi abin da ake so a ajiye ɗin. Page wanda yake ɗauke da abubuwan da aka ajiye a cikinsa zai bayyana.
Shikenan an yi ajiya a cikin google drive ɗin, duk lokacin da ake buƙata sai a yi amfani da shi. Wani lokacin idan an ajiya (upload) sai ya nuna waiting for WiFi. To hakan yana faruwa ne musamman idan wannan ne lokaci na farko da mutum ya fara amfani da google drive ɗin.

KU KUMA KARANTA: Za mu bai wa Google goyon baya don samar da ayyukan yi miliyan ɗaya ga ‘yan Najeriya – Tinubu

A wasu lokutan kuma idan ana da matsalar network (data) ana fuskantar hakan. Idan aka yi upload, sai a ga yana nuna waiting for WiFi, to ga yadda za a yi masa.
A saman wayarka akwai wasu layuka guda 3 a kwance daga gefen hagu (options) kusa da Search in Drive, za a ga wani feji zai buɗe sai a danna Settings. Zai ƙara buɗe wa, to daga can ƙasa an rubuta ‘Data Usage’ a gefen rubutun akwai wani ɗigo shuɗi (blue) sai a danna.
Shikenan wannan matsalar an yi maganinta.

Akwai abubuwa masu yawa waɗanda google drive kan iya taimaka wa wajen yin amfani dasu. Google Drive yana ba da damar ajiyar kowane irin file kamar yadda muka ambata a baya. Za a iya adana file komai girmansa idan bai wuce nauyin 15GB ba. Kaɗan daga cikin mahimman amfaninsa shi ne:
1) Upload: Yadda za a ɗora abu a kan google drive, kamar yadda na kawo misali a baya.
2) Scan: Google drive ya kan ba da damar yin scanning na takardu masu mahimmanci, kamar na karatu kuma a adana shi a cikin drive, kuma ya kan ba da damar yin amfani da su a duk lokacin da ake da buƙatarsu. Kamar a wajen rijista ta yanar gizo, lokuta da dama a kan buƙaci takardun kammala karatu ta hanyar tura wa a website na neman aiki ko scholarship da sauransu. Scan yana taimaka wa sosai wajen kiyayewa haɗarin gobara, ruwa da abubuwa makamantansu da kan iya kawo lalacewar takardu ko ɓatansu. Idan kana da google drive babu kai ba yawo da takardu a hannu.
3) Folder: Folder tana taimaka wa wajen rarrabe files da aka adana.
4) Ana iya ƙara girman memory storage space daga 15GB zuwa 100GB, 150GB, 200GB zuwa sama da hakan amma wannan siya ake yi, wato (Drive Upgrade).
Za mu yi bayaninsa a nan gaba.