Shugaba Bola Tinubu ya amince da wasu kamfanonin jiragen sama guda uku da za su yi jigilar maniyyata aikin hajjin shekarar 2024.
Kamfanonin jiragen da aka amince su ne: Air Peace Ltd, FlyNas da Max Air.
Madam Fatima Sanda-Usara, mataimakiyar daraktar hulɗa da jama’a ta NAHCON ce ta bayyana hakan a wata sanarwa da ta fitar ranar Juma’a a Abuja.
Sanda-Usara ta kuma bayyana cewa gwamnatin tarayya ƙarƙashin jagorancin Tinubu ta amince da wasu kamfanonin dakon jiragen sama guda uku da za su rika jigilar alhazai.
A cewar ta, jiragen guda ukun sun haɗa da Cargo Zeal Technologies Ltd., Nahco Aviance da Qualla Investment Ltd,.
Ta ce amincewar ta kara da ƙudurin gwamnatin tarayya na tabbatar da samun cikakkiyar masaniyar aikin hajji ga maniyyatan Najeriya.
KU KUMA KARANTA: Hukumar alhazai ta ƙasa ta tsawaita wa’adin rufe karɓar kuɗin aikin Hajji na 2024
“Saboda haka, a lokaci guda gwamnatin tarayya ta amince da rabon maniyyata mahajjata daga jihohi daban-daban ga kowane kamfanin jirgin da aka amince da shi kamar haka:
“Air Peace za tayi jigilar maniyyata daga Abia, Akwa Ibom, Anambra, Bayelsa, Cross River, Delta, Ebonyi, Edo, Ekiti, Enugu, Imo, Kwara, Ondo, Jihohin Ribas da Babban Birnin Tarayya (FCT).
“FlyNas za ta yi jigilar maniyyata daga jihohin Borno, Legas, Osun, Ogun, Niger, Sokoto, Kebbi, Yobe da Zamfara.
Sai Kuma Max Air da ke da kaso mafi tsoka ne zai dauki nauyin jigilar alhazai daga jihohin Bauchi, Benue, Kano, Katsina, Kogi, Nasarawa, Adamawa, Oyo, Taraba, Kaduna, Sojoji, Gombe, Jigawa da Filato.
Ta bayyana cewa rabon alhazai ga kamfanonin jiragen sama ya yi daidai da yarjejeniyar da aka cimma tsakanin Najeriya da Saudiyya kan jigilar maniyyata a ƙarƙashin kason gwamnati (BASA).
“Duk da haka, gwamnatocin jihohi na iya zaɓar kowane ɗayan kamfanonin jigilar kayayyaki da aka amince da su don isar da kayan alhazai da suka wuce gona da iri.
“Shugaban NAHCON, Malam Jalal Arabi, ya taya kamfanonin jiragen sama da aka amince da su, ya kuma yi ƙira gare su da su tashi tsaye domin sauƙaƙa aikin hajjin bana na shekarar 2024.”
Ta ce NAHCON ta ci gaba da duƙufa wajen tabbatar da mafi girman matsayi a harkar aikin hajji, tare da mai da hankali kan tsaro da gamsar da mahajjata.
Sanda-Usara ya bayyana cewa Ministan Harkokin Waje, Amb. Yusuf Tuggar, na shirin jagorantar wata tawaga daga hukumar NAHCON domin halartar rattaba hannu kan yarjejeniyar aikin hajjin 2024 a ranar 7 ga watan Janairu.
