Al'ajabi
Tayi ƙunar baƙin wake ta kashe kanta saboda bashin naira dubu saba’in
Wata mata mai matsakaicin shekaru da ke zaune a Abeokuta,a jihar Ogun, ta kashe kanta bayan ta bankawa kanta wuta kan bashin N70,000.
Matar da aka fi sani da Mama Dada ta kuma bankawa gidan haya da ta ke zaune a ciki wuta, lamarin da ya faru a Oke-Keesi, yankin Itoko a Abeokuta, a ranar Asabar.
Shaidu sun ce matar ta ƙone yadda ba za a iya gane ta ba, yayin da ginin shi ma ya ƙone gaba ɗayansa.
Maƙwabtan ta sun ce matar ta karɓi bashi ne daga bankin Lapo Microfinance wanda aka fi sani da “Gbomu le lantern”, amma ta shiga cikin damuwa saboda rashin iya biyan bashin.
Akan wannan kaddara, an ruwaito matar ta aika ɗaya daga cikin ‘ya’yanta ya saya mata man fetur, an ce matar ta ɗauki man fetur din, ta ba yaron uzuri ya fita, ta kulle kanta, ta jika ɗakin har da ita, sannan ta cinnawa gidan wuta.
KU KUMA KARANTA:Yadda magidanci ya ƙone matarsa da fetir saboda abinci
Wata makwabciyarta mai suna Rasheed Aina ta bayyana cewa matar ta kashe kanta ne bayan ta kasa biyan bashin da ta karɓa daga wani banki na ƙananan kuɗaɗe da aka fi sani da ‘LAPO’.
“Makwabciyarta ta gaya min cewa bashin ya kai N70,000,” in ji Aina.
Sakataren ƙungiyar ci gaban al’umma,ta CDA a yankin da lamarin ya faru mai suna Babawale, ya bayyana cewa, “ta karɓi bashin ‘Gbomu le lantern’ kuɗi naira 70,000, kuma da ta kasa biyan kuɗin da za ta biya sai ta aika ɗant na karshe ya siyo mata manfetir sannan ta yi amfani da salo wajen sallamar yaron sannan ta kulle kanta a cikin ɗaki, ta zuba manfetur a ko’ina har da kanta sannan ta banka wa wurin wuta. ”
An ajiye gawar ta a babban asibitin jihar dake Ijaye a Abeokuta. Da aka tuntuɓi kakakin rundunar ‘yan sandan jihar, Abimbola Oyeyemi, ya ce ba a yi masa bayani kan lamarin ba.
An ƙona mutane suna Sallar Asuba a masallaci a Kano
Rundunar ‘yan sandan jihar Kano a arewacin Najeriya ta ce ta kama wani mutum da ake zargi da cinna wa wani masallaci wuta yayin da mutane ke Sallar Asuba ranar Laraba.
Lamarin ya faru ne a ƙauyen Gadan da ke Ƙaramar Hukumar Gezawa a jihar ta Kano, da misalin karfe 5:20 lokacin da ake sallah, a cewar sanarwa ‘yan sanda.
Kakakin rundunar ‘yan sandan jihar Kano, Abdullahi Haruna Kiyawa ya tabbatar wa da TRT Afrika Hausa faruwar lamarin da kama mutumin da ake zargi, sai dai ya ce ana ci gaba da gudanar da bincike.
Abdullahi Kiyawa ya ce bincike ya nuna cewa mutumin da ake zargi da cinna wutar Shafi’u Abubakar mai kimanin shekaru 38 ya jefa wata roba ne ɗauke da fetur cikin masallacin, sannan ya cinna wuta.
KU KUMA KARANTA: Mahara a Anambara sun ƙona fadar babban Basarake ƙurmus
Kakakin ‘yan sandan ya ce mutum 24 ne suka ƙone a masallacin, da suka haɗar da manya 20, yara huɗu.
An garzaya da duka waɗanda suka jikkata zuwa asibiti don ba su kulawa, amma babu wanda ya mutu a haɗarin, a cewar sanarwar ‘yan sandan.
An tsinci gawar wata ɗaliba mai suna Aisha Yahaya ta Jami’ar Kimiyya da Fasaha ta Aliko Ɗangote da ke Wudil, a wani gida da ke wajen jami’ar.
Aisha, ɗaliba ce da ke matakin karatu na uku wato ‘level 300’ a sashen nazarin Kimiyya da Fasahar Abinci na jami’ar wadda aka tsinci gawarta bayan ta koma ɗakinta.
An ce ɗalibar ta rubuta jarrabawarta ta farko a zangon karatun na farko da ake yi a jami’ar.
Wasu daga cikin abokan karatunta sun danganta mutuwarta da shiga cikin matsi da damuwa a dalilin karatu da kuma zana jarrabawar.
A cikin wasiƙar ta’aziyyar, hukumar jami’ar ta bayyana matuƙar baƙin cikinta dangane da rasuwar Aisha Yahaya.
KU KUMA KARANTA: An tsinci gawar wani mutum a kan titi a Kano
Sanarwar ta ce, “Aisha ɗaliba ce mai hazaƙa wadda ta rasu a dalilin bugun zuciya. Za a riƙa tunawa da ita a kan sha’awarta na karatu da jajircewarta kan harkokin karatunta.”
Jami’ar ta ƙara da cewa, ba a iya gano wata da ke tattare da ita ba gabanin mutuwarta saboda ba ta nuna alamun rashin lafiya ko fama da wata cuta ba.
Wata budurwar ta mutu bayan ta yi wa tabar kolarado shan Allah tsine uwar mai ƙarya.
Budurwar, wadda har yanzu ba a bayyana sunanta ba ta mutu bayan shan tabar ce a karshen mako a Awka, babban birnin jihar Anambra.
Wani bidiyon da ke yawo a kafafen sada zumunta ya nuna gawar budurwa a yashe a gefen titi.
Shaidu da ke tare da ita lokacin da abin ya faru sun bayyana cewa da farko bayan ta sha tabar ta suma.
A dalilin haka jama’a suka ba ta garin rogo da yawa ta sha ta farfaɗo, daga bisani ta ƙara zuwa ta sha tabar.
KU KUMA KARANTA: Rikici a kan tabar wiwi ya yi ajalin mutum ɗaya a Gombe
Sha tabar da ta kara yi ne ya birkita ta, inda har ta riƙa tuɓe kayanta tana watsarwa, mutane suka riƙa bin ta suna rufe mata tsiraici kafin daga bisani ta kwanta ta ce ga garinku nan.
Da aka tuntubi kwamandan hukumar yaki da sha da fataucin miyagun kwayoyi ta kasa (NDLEA) a Jihar Anambra, Daniel Onyishi, ya bayyana irin wannan lamari a matsayin daya daga cikin manyan illolin shaye-shayen miyagun kwayoyi da kuma yadda suke halaka matasa.
A cewarsa, tabar kolorado na da hatsarin gaske ga lafiyar al’umma, da suke lalata rayuwa, su mayar da mutum mara amfani a cikin al’umma.
Ya bayyana cewa ‘kolorado’ tana zama wani irin bala’i da in mutum bai sha ba, sai ya ji kamar zai mutu.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano