Labarai
Taliban ta hana matan Afghanistan fita karatu a UAE
Dubban matan Afganistan da aka bai wa guraben karatu a Hadaddiyar Daular Larabawa an hana su ficewa daga Afghanistan, kamar yadda ɗaya daga cikin matan ta shaida wa Kamfanin Dillancin Labaran Faransa a ranar Alhamis, biyo bayan ƙorafe-ƙorafe daga mai ɗaukar nauyinsu na Masarautar.
Laila, mai shekaru 22, na ɗaya daga cikin mata kusan 30 da fitaccen ɗan kasuwa Khalaf Ahmad Al Habtoor ya ɗauki nauyin ɗaukar nauyin karatu a Haɗaɗɗiyar Daular Larabawa, amma an hana su tashi daga filin jirgin saman Kabul ranar Laraba.
An hana mata da ‘yan mata shiga makarantar sakandare da jami’a a Afghanistan bayan da hukumomin Taliban suka karɓe ikon ƙasar a watan Agustan 2021.
Laila, wadda aka sauya sunanta saboda tsoron ramuwar gayya ta ce: “Bari mu ne kawai mu fita ƙasashen waje don ci gaba da karatunmu.”
“Wannan dama ce mai ban mamaki a gare mu amma, kamar komai, an karɓe wannan damar daga gare mu.”
KU KUMA KARANTA: Taliban ta haramta wa matan Afganistan yin kayan kwalliya, da rufe waɗanda ake da su
Za ta fara karatun digirin ne a Dubai, bayan an tilasta mata yin watsi da karatun aikin jarida a ƙarƙashin gwamnatin Taliban.
Laila ta ce ita da sauran matan sun isa bakin ƙofar tashi, amma a ƙarshe wasu mazan da ke sanye da kayan aikin filin jirgin suka bijire musu, inda suka ce suna da umarnin hana waɗanda ke da takardar izinin karatu su fice daga ƙasar.
Jami’an Taliban ba su amsa buƙatun na AFP don yin sharhi ko tabbatarwa ba.
Al Habtoor, wanda shi ne shugaban ƙungiyar Al Habtoor da ya kafa ƙungiyar, ya caccaki hukumomin Afghanistan a ranar Laraba a wani saƙon da ya wallafa a shafin X, wanda a da ake ƙira Twitter, sannan ya buƙace su da su bar matan su tafi.
Ya ce kimanin mata 100 ne aka ba su tallafin karatu tare da haɗin gwiwar jami’ar Dubai kuma ma’aikatan Al Habtoor Group sun yi aiki na tsawon watanni don tabbatar da komai ya tanadar musu.
“Hukumomi a Afganistan, ba tare da wata hujja ba, sun hana su fita, tare da tauye ‘yancinsu ba bisa ƙa’ida ba. Ina roƙon duk ɓangarorin da abin ya shafa da su gaggauta shiga don taimakawa wajen ceto da kuma taimakawa waɗannan ɗaliban da ke fafitikar,” in ji Al Habtoor a cikin sakon.
“Suna da ‘yancin yin karatu, suna da ‘yancin yin duk abin da mazan za su iya yi kuma babu wani abin da ya rage ga hakan,” in ji shi a cikin wani faifan bidiyo.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: Sojojin Pakistan tara sun mutu, sakamakon hare-haren ‘yan Taliban | Neptune Prime Hausa