Sojoji 6 da ‘yan Boko Haram 34 sun mutu a wata arangama
Rundunar sojin Najeriya ta ce dakarunta sun kashe ‘yan ta’adda 34 a wani artabu da suka yi da ‘yan Boko Haram a arewa maso gabashin jihar Borno sannan kuma sojoji shida sun mutu.
Rikicin ya faru ne a ƙauyen Sabon Gari lokacin da ‘yan ta’addan suka yi wa sojojin da ke komawa sansaninsu kwanton ɓauna, kamar yadda kakakin rundunar, Manjo-Janar Edward Buba ya bayyana a ranar Laraba.
Ya ce ‘yan ta’addan na ƙungiyoyin Boko Haram da ISWAP ne. Suna tafiya ne a kan babura da manyan motoci dauke da bindigogi lokacin da suka kai harin a ranar Asabar.
Dakarun tare da taimakon wasu dakaru na rundunar sa kai na Civilian Joint Taskforce da kungiyoyin ‘yan banga sun yi nasarar dakile harin, in ji shi.
Najeriya dai ta shafe shekaru 16 tana fama da tashe-tashen hankula a yankin arewa maso gabashin kasar da kungiyar Boko Haram ke haddasawa da kuma kungiyar ta ISWAP, wanda ya janyo asarar dimbin jama’a da na tattalin arziki da suka hada da gudun hijira da kuma matsalar jinƙai.
Buba ya ce sojoji 6 ne suka mutu a harin arangamar da wasu bama-bamai da aka dasa suka tashi suka raunata kwamandan ‘yan banga.
KU KUMA KARANTA: Sojojin saman Najeriya, sun shirya bukin ƙarshen shekara a Katsina
Hakazalika rundunar sojin saman Najeriya ta kai farmaki ta sama kan ‘yan ta’addan da suka tsere, lamarin da ya yi sanadin jikkatar mutane 34 da aka kashe a rikicin, in ji Buba.
