Labarai
Najeriya ta kusa kawo ƙarshen ƙalubalen tsaro – Gwamna Buni
Daga Ibraheem El-Tafseer
Gwamnan jihar Yobe, Alhaji Mai Mala Buni CON, ya ce a tsanake zaɓar sabbin shugabannin tsaro da shugaba Bola Tinubu ya yi zai sa Najeriya ta kusa kawo ƙarshen ƙalubalen tsaro da ake fuskanta a ƙasar.
Ya yi nuni da cewa, mai ba shugaban ƙasa shawara kan harkokin tsaro, Malam Nuhu Ribadu, zai yi amfani da ƙwarewarsa wajen yaƙi da rashin tsaro.
“Haka zalika, hafsoshin tsaro suna da ƙwarewa da ƙwarin gwiwar ‘yan Najeriya wajen jagorantar yaƙi da rashin tsaro a Najeriya.
“A matsayinmu na mutanen da suka fito daga jihohin da rashin tsaro ya adda ba, muna yaba wa gwamnatin tarayya da hukumomin tsaro bisa gagarumin nasarorin da aka samu a jihohin.
KU KUMA KARANTA: Shugaban Najeriya ya kori manyan hafsoshin tsaron ƙasar
“Muna da ƙwarin gwiwar cewa a matsayinmu na masu taka rawa da himma waɗanda suka taka muhimmiyar rawa wajen samar da zaman lafiya a jihohin, sabbin shugabannin ma’aikata za su ƙara dagewa wajen kawo ƙarshen ƙalubalen rashin tsaro.
“A lokuta daban-daban sun nuna ƙimarsu da ƙwarewarsu a ayyuka daban-daban na ƙasa” Gwamna Buni ya jaddada.
“Shugaban ya yi zaɓi mai kyau kuma za mu ci gaba da tallafawa duk ayyukan tsaro a yankinmu,” in ji shi.
Ya ƙara da cewa “Malam Nuhu Ribadu ƙwararren ɗan wasa ne wanda zai yi aiki tare da Jami’an tsaro domin cimma burin da aka sa gaba.”
Gwamnan ya yi ƙira ga ‘yan Najeriya da su marawa sabuwar ƙungiyar baya domin samun nasara.
Ya yabawa gwamnatin Buhari kan inganta kayan aiki da kuma gina sabon wurare a cikin jami’an tsaron ƙasar don ganin aikin da aka ba su a matsayin ƙira ga ayyukan ƙasa.
“Waɗannan gagarumin ƙoƙarin sun ƙarawa jami’an tsaro ƙwarin guiwa wajen yaƙi da matsalar rashin tsaro yadda ya kamata, yadda ya kamata kuma tare da jajircewa” inji Gwamna Buni.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano