Ƙasashen Waje
Mutum 15 sun mutu a harin da ƴan bindiga suka kai coci a Burkina Faso
Fararen-hula aƙalla 15 ne suka mutu sannan biyu suka jikkata a wani harin “ta’addanci” da aka kai a cocin Katolika da ke arewacin Burkina Faso ranar Lahadi, a cewar wani babban jami’in cocin.
“Muna sanar da ku cewa an kawo harin ta’addanci a cocin Katolika da ke ƙauyen Essakane yau, 25 ga watan Fabrairu, yayin da mutane suka haɗu suna gudanar da ibada,” in ji shugaban cocin Dori, Jean-Pierre Sawadogo, a wata sanarwa da ya aike wa kamfanin dillancin labarai na AFP.
Ya ƙara da cewa mutanen da suka mutu sun kai 15 sannan mutum biyu sun jikkata.
Sawadogo ya yi ƙira da a zauna lafiya a Burkina Faso sannan ya soki waɗanda ya ƙira “mutanen da ke ci gaba da kashe jama’a da raba kan ƙasarmu”.
KU KUMA KARANTA: Mali da Burkina Faso sun miƙa wa ECOWAS wasikar ficewarsu
Ƙauyen Essakane yana kan iyakar ƙasar da Mali da Jamhuriyar Nijar.
Wannan shi ne hari na baya bayan nan da ake ɗora alhakin kai shi kan ƙungiyoyin da ke iƙirarin jihadi a yankin, waɗanda kan kai hare-hare a coci-coci sannan a wasu lokutan suna sace malaman cocin.
Burkina Faso na da faɗin ƙasa a yankin Sahel, inda masu iƙiradin jihadi suka matsa ƙaimi wajen kai hare-hare tun bayan faɗuwar gwamnatin Libya a 2011 da kuma ƙwace iko da masu iƙirarin jihadi suka yi da arewacin Mali a 2012.
Waɗannan hare-hare sun watsu zuwa maƙwabciyarsu Jamhuriyar Nijar.
Shugaban mulkin sojin ƙasar Kyaftin Ibrahim Traore, wanda ya ƙwace mulki a 2022, ya sha alwashin murƙushe masu tayar da ƙayar baya, amma har yanzu lamarin ya gagara.
Alƙaluma sun nuna cewa an kashe mutum fiye da 20,000 a hare-haren da masu tayar da ƙayar baya suke kai wa Burkina Faso sannan an raba sama da mutum miliyan biyu da muhallansu.
Isra’ila ta ƙaddamar da sabbin hare-hare a kudancin Gaza
Isra’ila ta ƙaddamar da sabbin hare-hare a kudancin Gaza, inda ta tilasta wa ɗaruruwan Falasɗinawa tserewa bayan da soji suka kuma ba da umarnin ƙaurace wasu yankuna masu yawan jama’a.
KU KUMA KARANTA: Sojojin Isra’ila sun ce an yi musayar wuta da dakarun Masar
Waɗanda suka shaida lamarin sun ce an kai hari da dama a ciki da wajen birnin Khan Younis, inda aka hallaka mutane takwas kuma mutane sama da 30 suka samu raunuka, cewar wata majiyar lafiya da kuma ƙungiyar Red Crescent ta Falasɗinawa.
Farashin man fetur zai ƙaru a watan Yuli a Ghana – COPEC
Ƙungiyar Kare Haƙƙin Masu Amfani da Man Fetur a Ghana ta yi hasashen cewa akwai yiwuwar a samun ƙarin farashin man fetur a ƙasar a farkon watan Yulin 2024.
Ƙungiyar ta Chamber for Petroleum Consumers (COPEC) ta ce akwai alamu masu ƙarfi da ke nuna cewa farashin fetur da man dizel da gas zai ƙaru baki ɗaya a gidajen man da ke faɗin ƙasar, kamar yadda kamfanin watsa labarai na ƙasar Ghana ya ruwaito.
COPEC ɗin ta ce za a samu ƙarin farashin ne sakamakon yadda farashin Cedi ɗin a ƙasar ke ƙara karewa idan aka kwatanta da dalar Amurka.
COPEC ɗin ta yi hasashen cewa farashin man fetur ɗin wanda za a rinƙa sayarwa a gidan mai zai ƙaru da kashi 2.17 cikin 100, wanda hakan ke nufin zai ƙaru daga Cedi 14.17 zuwa Cedi 15.20 a duk lita.
Sai kuma farashin dizel ana sa ran ya ƙaru zuwa 15.21 a kowace lita ɗaya, sai kuma na gas ya koma tsakanin Cedi 13.24 zuwa Cedi 14.64 a duk kilo ɗaya.
KU KUMA KARANTA: Ɗan Ghana ya kafa tarihi na rungumar bishiyoyi a duniya
Ƙungiyar ta COPEC ta bayar da shawara ga gwamnatin Ghana da ta yi duk mai yiwuwa domin rage harajin da yake a kan gas ko kuma yin tallafi a farashinsa domin bayar da dama ga ‘yan ƙasar su same shi a farashi mai rahusa.
Ta kuma yi ƙira ga gwamnati da kada ta yi ƙasa a gwiwa wajen dawo da matatar mai ta Tema a kan aiki (TOR) don kaucewa ko kuma rage shigo tattacen man fetur wanda a wani lokacin ake samun gurɓatacce.
An kammala zagayen farko na zaɓen shugaban ƙasa a Iran
Daga Ibraheem El-Tafseer
Me magana da yawun Shelkwatar zaɓe ta Iran Dakta Muhsin Elsami, ya sanar da cewa, an kammala lissafi ƙuri’a Miliyan 25 na zaɓen shugaban ƙasar Iran wanda aka fara ranar juma’a.
‘Yan takara 6 ne suka tsallake matakin ƙarshe yayin da 2 suka fice saboda ra’ayin kai, ana zaɓe saura kwana 2.
Dakta Mas’ud Pezeshkian shi ne kan gaba da ƙuri’a Miliyan 10.415.991
Dakta Sa’ed Jalili ya samu ƙuri’u Miliyan 9.473298
Se kuma Dakta Qalibaf ya samu ƙuri’a Miliyan 3.383.340
Sai Ayatullah Musfata ya samu ƙuri’a 206.397.
Yanzu haka an fitar da Dakta Baqir Qalibaf da Ayatullah Musfata da suke da ƙarancin ƙuri’a, ya rage saura Dakta Jalili da Dakta Mas’ud Pezeshkian da ken gaba.
KU KUMA KARANTA: Iran ta tabbatar da mutuwar shugaban ƙasar, Ebrahim Ra’isi, a hatsarin jirgin sama
Jami’i Muhsin Elsami ya sanar da cewa za’a shiga matakin zaɓe na 2 ranar Juma’a mai zuwa inda za a kara tsakanin Dakta Jalili da Dakta Mas’ud.
Cikin su duk wanda ya samu kaso 50 ya zama shugaban ƙasar Iran, wanda zai maye gurbin Shahid Ebrahim Ra’isi wanda ya rasu sanadiyyar hatsarin jirgin Helikofta, a watan da ya gabata.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano