Labarai
Mutane 30 sun mutu sakamakon zaftarewar ƙasa a Abuja
A ƙalla mutane 30 ne aka ruwaito sun mutu sakamakon zaftarewar ƙasa sakamakon ayyukan masu haƙar ma’adanai ba bisa ƙa’ida ba a ƙaramar hukumar Kuje da ke babban birnin tarayya Abuja.
Wannan dai na zuwa ne a daidai lokacin da aka kuma yi garkuwa da mutane 19 a jiya a ƙaramar hukumar Bwari da ke babban birnin tarayya Abuja.
An bayyana tagwayen faruwar lamarin ne a wani taro da aka yi tsakanin ministan babban birnin tarayya, Nyesom Wike da shugabannin ƙananan hukumomin shida.
Ministan wanda ya yi mamakin faruwar lamarin, ya ce zai gayyaci daraktan ayyuka na jiha na babban birnin tarayya Abuja da kuma kwamishinan ‘yan sanda domin samun isassun bayanai kan lamarin sace-sacen da aka yi da kuma sauƙaƙa ayyukan ceto.
KU KUMA KARANTA: Rugujewar gini ya kashe mutane biyu a Legas
Wike ya buƙaci shuwagabannin majalisar da su kafa rundunar sa ido a yankunansu domin sa ido kan ayyukan haƙar ma’adanai, kamar yadda ya yi alƙawarin ganawa da takwaransa na kamfanin Solid Minerals, Dele Alake, domin fara tattaunawa kan kawar da haƙo ma’adinai ba bisa ƙa’ida ba a babban birnin tarayya Abuja.
Haka kuma, ƙaramar ministar babban birnin tarayya, Dakta Mariya Mahmoud, da sakatariyar dindindin a Abuja, Olusade Adesola, sun bayyana aniyar gwamnatin na ci gaba da haɗa hannu da majalisun yankin domin tabbatar da hatta ci gaban yankin.
Da yake magana kan ƙalubalen da ke gaban kansilolin, shugaban ƙaramar hukumar Kwali, Ɗanladi Chiya, ya yi ƙira ga ministan da ƙaramar minista da su kawo musu ɗauki.
“Lokacin da muka ji labarin naɗin naka, mun yi farin ciki saboda ka kasance shugaban kansila, don haka, ka fahimci ƙalubalenmu. Ƙalubalen mu shi ne rashin isassun kuɗaɗe na tsarin ƙananan hukumomi.
“Muna da babban ƙalubalen rashin tsaro a faɗin ƙananan hukumomin shida. A yau (Alhamis) ne aka yi garkuwa da mutane kusan 19 a majalisar yankin Bwari. Na karɓi kusan biyar a majalisa ta waɗanda aka yi garkuwa da su kusan kwanaki shida.
“Na gaba shi ne ci gaban garuruwan tauraron ɗan adam. Batun tsaftar muhalli na ɗaya daga cikin manyan ƙalubalen da ke fuskantarmu.
Haka kuma babu ingantaccen wurin sufuri. Motocin Abuja ‘Urban Mass Transit’ ba sa aiki. “Sai kuma batun rabon filaye, za ku zauna a majalisar ku, kuma za a ware gidan bayan ku ga wanda ba ku sani ba.
Za a ware maƙabartar ku da wuraren ibada kuma muna cewa a tafi da mu ta fuskar rabon fili,” in ji Chiya.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano