Mutane 3 sun mutu a wani rikicin coci
Rundunar ’yansandan Jihar Taraba, ta tabbatar da mutuwar mutum uku sakamakon rikici da ya faru tsakanin mabiya cocin United Methodist Church in Nigeria (UMCN) da kuma na Global Methodist Church (GMC).
Kakakin rundunar ’yan sandan, SP Usman Abdullahi, ya bayyana cewa rikicin ya faru ne a ranar Lahadi a Ƙaramar Hukumar Karim-Lamido.
Rahotanni, sun nuna cewa rikicin ya samo asali ne sakamakon wata taƙaddama tsakanin mambobin cocin biyu.
Rikicin ya sa gwamnatin jihar bayar da umarnin rufe hedikwatar cocin UMCN da ke Jalingo.
KU KUMA KARANTA: Mutane fiye da 100 sun mutu sakamakon rikicin da ya ɓarke a filin ƙwallon ƙafa
Rundunar ta ce an kama mutum shida da ake zargi da hannu a rikicin, sannan an tura jami’an tsaro yankin domin tabbatar da zaman lafiya.
Bincike, ya nuna cewa taƙaddamar ta samo asali ne daga rikicin shugabanci tsakanin UMCN da GMC, wanda ya raba kan mambobin cocin gida biyu, har wasu suka ware tare da kafa nasu tsagin.
