Labarai
Membobin NYSC 5 za su maimaita shekarar yiwa ƙasa hidima a Bauchi
Rifkatu Yakubu, shugabar hukumar yi wa ƙasa hidima ta ƙasa NYSC reshen jihar Bauchi, ta bayyana cewa biyar daga masu yi wa ƙasa hidima na rukunin ‘Batch B stream 1’ na shekarar 2022, za su maimaita shekarar hidimar su a jihar.
Ta bayyana hakan ne ga Kamfanin Dillancin Labarai na Najeriya (NAN) a Bauchi a ranar Alhamis, yayin da ‘yan ƙungiyar ke karɓar takardar shaidar yi wa ƙasa hidima.
Misis Yakubu ta ce an hukunta membobin ƙungiyar da abin ya shafa saboda laifuka daban-daban da suka haɗa da tserewa da kuma rashin zuwa lokacin aikinsu na shekara.
Ta sake nanata cewa shirin ba shi da juriya ga barin aiki kuma ba zai yi shakkar hukunta duk wani ɗan ƙungiyar da ya yi kuskure ba.
KU KUMA KARANTA: ‘Yan sanda sun kama wani ɗan NYSC da ake zargi da aikata fyaɗe a Ogun
A cewarta, “wasu membobin ƙungiyar guda 10 za a tsawaita shekarar hidimarsu na aƙalla makonni uku ko wata ɗaya, saboda wasu munanan ayyuka a shekarar hidimarsu.”
Sai dai ta yi ƙira ga ‘yan ƙungiyar da za su fita da su wuce gida kai tsaye su haɗu da iyayensu da ‘yan uwansu, inda ta buƙace su da su guji tafiye-tafiyen dare.
Bugu da ƙari, Kodinetan ta ba da umarni ga membobin ƙungiyar da ke shiga sansanin horar da ƙwararrun sana’o’i da horar da ‘yan kasuwa, don tabbatar da kammalawa.
Ga waɗanda suka kasa koyan wata sana’a a lokacin da suke hidimar, Misis Yakubu ta shawarce su da su fara wani abu domin gujewa sanya wa iyayensu ciwo.
“Iyayenku suna so su ga kuna yin wani abu, komai ƙanƙantarsa. Ya fi zama a gida ba tare da yin komai ba, ”in ji ta.
Membobin ƙungiyar su 747 sun gama a jihar Bauchi kuma an ba su takardar shaidar yi wa ƙasa hidima.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano