Jami’an tsaro sun kashe ’yan bindiga shida tare da ƙwato makamai a jihohin Kaduna da Katsina.
A jihar Katsina ’yan sanda sun hallaka ’yan bindiga uku suka kuma ceto mutum uku da aka yi garkuwa da su a yankin Gogalo da ke ƙaramar hukumar Jibia.
Maharan sun shigo ƙauyen ne ɗauke da muggan makamai, inda suka sace mutum uku.
Daga bisani ’yan sanda suka bi sawu, suka hallaka uku daga cikinsu sannan suka ƙwato waɗanda aka sacen.
KU KUMA KARANTA: Za mu inganta tsaro ta hanyar haɗa kan jami’an tsaro da tattara bayanan sirri
A jihar Kaduna, sojojin sun hallaka ’yan bindigar ne a yankin ƙananan hukumomin Kajuru da Birnin Gwari na jihar.
Sun kuma kama bindigogi ƙirar AK47 da sauran makamai da wayoyi, wasu kuma suka tsere da raunukan harbi.
