Isra’ila ta amince ta dinga dakata kai hare-hare cikin Gaza na tsawon awa huɗu a kowace rana don bai wa mutane damar tserewa daga yaƙin, a cewar Fadar White House.
“Isra’ila za ta fara aiwatar da dakatar da buɗe wuta ta tsawon sa’o’i huɗu a yankunan arewacin Gaza a kowace rana, tare da bayar da sanarwar sa’o’i uku kafin hakan,” kamar yadda mai magana da yawun kwamitin tsaron ƙasar John Kirby ya shaida wa manema labarai.
“Mun yi amanna cewar wannan dakatawar wani mataki ne na hawa madaidaiciyar hanya, musamman ma don tabbatar da cewa fararen hula za su samu damar tserewa zuwa yankuna masu aminci da ke nesa daga inda ake yaƙin,” ya ce.
Dakatawar ɗan lokacin zai kuma ba da damar shigar da kayan jinƙai cikin yankunan da ake so tare da bai wa Falasɗinawa ficewa salin alin,” a cewar Kirbi.
