Falasɗinawa aƙalla takwas ne suka mutu yayin da dayawa suka jikkata sakamakon luguden wuta da Isra’ila ta yi da makamai masu linzami a asibitin Indonesia da yankunan da ke kusa da shi a arewacin Gaza, a cewar wasu majiyoyi na asibitin, baya ga buɗe wuta da Isra’ila ta yi kan duk mutumin da ya yi yunƙurin fita daga asibitin.
Majiyoyin sun ƙara da cewa dakarun Isra’ila sun yi ta ɓarin wuta a hawa na biyu na asibitin, lamarin da ya sa wurin ya lalace baƙi ɗaya, sannan ta jikkata likitoci biyu a yayin da suke aiki.
KU KUMA KARANTA: Lauyoyin Falasɗinawa sun shigar da Isra’ila ƙara a kotun ICC
Sun ƙara da cewa adadin mutanen da Isra’ila ta kashe yayin harin yana ƙaruwa, musamman bayan da ta katse wutar lantarki don haka yana da matukar wahala a iya yi wa mutane tiyata don ceto rayukansu.
Ganau sun ce hare-haren na Isra’ila sun sa wutar lantarkin asibitin ta katse bayan janaretocinta sun daina aiki.
