Aƙalla Falasɗinawa 15 Isra’ila ta kashe a harin da ta kai Khan Younis da ke kudancin Gaza, da kuma sansanin ‘yan gudun hijira na Nuseirat, kamar yadda kafar watsa labarai ta Falasɗinawa ta ruwaito.
Kamfanin dillancin labarai na Wafa ya ce jiragen yakin Isra’la sun kai harin ne da asubahi a gidaje biyu da ke Khan Younis.
Kamfanin dillancin labaran ya ƙara da cewa an kashe farar hula 13 a lokacin da jirgin ya kai hari kan gidan iyalan Zuhd da ke sansanin Nuseirat sannan wata mace da danta suka rasu a wani hari da jirgin sojin ya kai a gidan iyalan Abu Akar.
