Labarai
Hukumar NDLEA ta fasa kamfanin ‘Akuskura’ a Adamawa
Hukumar yaƙi da da hana sha da fataucin miyagun ƙwayoyi ta ƙasa (NDLEA), ta ƙona wata masana’anta a Adamawa dake kai wa ƙasashen Chadi da Kamaru da Jamhuriyar Nijar sinadarin Akuskura.
Kakakin hukumar, Femi Babafemi ne ya bayyana haka a wata sanarwa da ya fitar ranar Lahadi a Abuja, inda ya ce an kai samame a kamfanin ne ranar Asabar a garin Mubi.
“A lokacin da aka kai farmakin, ana ci gaba da gudanar da ayyukan samar da kayayyaki a harabar,” in ji shi, ya ƙara da cewa an kama magunguna masu yawa.
KU KUMA KARANTA: Hukumar NDLEA ta kama ɗalibi ɗauke da miyagun ƙwayoyi mai nauyin gram 600
Ya kuma ce jami’an hukumar a Binuwai sun ƙwato kwalaben ‘Syrup na Codeine’ guda 859 wanda nauyinsu ya kai kilogiram 117.3 da wani da ake zargin babban Dila ya yi watsi da su.
Kakakin NDLEA ya ce an yi watsi da kwalaben maganin tari mai nisan kilomita biyu daga wurin binciken hukumar NDLEA da ke kan hanyar Enugu zuwa Otukpo ranar Laraba.
Mista Babafemi ya kuma ce an kama wasu mutane biyu Kabiru Muhammed mai shekaru 35 da kuma Isah Muhammed mai shekaru 28 ɗauke da buhun tabar wiwi 20 mai nauyin kilogiram 11.2 da aka ɓoye a cikin buhun rogo (garri) a kan hanyar Zaria zuwa Kano ranar Juma’a.
A wani labarin kuma, jami’an tsaro sun ƙwato buhunan wiwi da bai kai kilogiram 74.5 ba a lokacin da suka kai samame a wani gini da ba a kammala ba a garin Ala da ke yankin Akure na jihar Ondo.
Mista Babafemi ya ce an gano kilo 60 na irin wannan abu da aka ɓoye a cikin takalmi a cikin buhu biyu na jumbo daga hannun wani Aminu Mohammed da ke kan hanyar Ibadan zuwa Oyo, jihar Oyo.
An kama wanda ake zargin ne a lokacin da yake jiran ya hau mota zuwa Kebbi. Ya naƙalto shugaban hukumar ta NDLEA Buba Marwa yana yabawa jami’ai da mazan jiya a Kano, Ondo, Oyo, Benue da Adamawa bisa yadda suke taka-tsan-tsan da ƙwarewa wajen sauƙe nauyin da aka ɗora musu.
Mista Marwa ya tuhume su da takwarorinsu na faɗin ƙasar nan da ka da su huta a kan bakarsu.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: Hukumar NDLEA ta kama ƙwayoyi da aka shigo da su a cikin kayan abinci | Neptune Prime Hausa