Hukumar DSS a Nasarawa, ta kama jami’an NASEMA bisa zargin karkatar da kayan abinci

Hukumar tsaron farin kaya (DSS) ta kama wasu jami’an Hukumar Ba da Agajin Gaggawa ta Jihar Nasarawa (NASEMA) tare da abokan aikinsu bisa zargin karkatar da kuma sayar da kayan abinci da aka tanadar wa Jihar.

Hakan na ƙunshe ne a cikin wata sanarwa da kakakin hukumar Dakta Peter Afunnaya ya rabawa manema labarai a Abuja.

Ya bayyana cewa kama waɗanda ake zargin ya biyo bayan rahotannin da Ma’aikatar ta samu daga wasu gwamnatocin Jihohi da suka shafi karkata ko siyar da kayan agajin da aka yi wa ‘yan ƙasarsu.

A cewarsa,” saboda haka hukumar ta gudanar da bincike a kan haka kuma ta ƙwato wasu daga cikin kayayyakin tare da cafke waɗanda ake zargin.

KU KUMA KARANTA: ‘Yan sanda a Filato sun kama wata mata da ta saci jaririya

“Yayin da ake ci gaba da gudanar da wannan aiki a wasu jihohi, alal misali, hukumar ta kama wani da ake zargi da aikata laifuka a jihar Nasarawa da ke da hannu wajen karkatar da kayan abinci da kuma sayar da kayan abinci da ake nufi da masu rauni.

“Daga cikin waɗanda ake zargin akwai jami’an Hukumar Ba da Agajin Gaggawa ta Jihar Nasarawa (NASEMA) da abokan aikinsu a kasuwanni, musamman Kasuwar Lafia ta zamani, inda ake sake sayar da kayayyakin.

Ya ƙara da cewa an miƙa waɗanda ake zargin ne domin ɗaukar matakin ladabtarwa.

Don haka hukumar ta yi ƙira ga jama’a da ke da masaniya kan wannan lamari da ya kunno kai da su kai rahoto ga hukumomin tsaro da abin ya shafa domin ɗaukar matakin da ya dace.