Sample Page Title

Aƙalla mutane 14 ne suka rasa rayukansu a wani mummunan hatsarin mota da ya auku a ƙauyen Zangoro dake kan hanyar Bauchi zuwa Darazo.

Kwamandan sashin na hukumar kiyaye haɗura ta ƙasa FRSC a jihar Bauchi Yusuf Abdullahi ne ya bayyana hakan a wani hatsarin mota da ya auku a ranar Alhamis a Bauchi.

Ya ce wasu mutane biyar sun samu mummunan raunuka daban-daban a haɗarin wanda ya faru a ranar Alhamis da misalin ƙarfe 12:17 na rana.

KU KUMA KARANTA: Hatsarin mota ya ci rayukan ‘yan sanda uku a Kaduna

A cewarsa, hatsarin ya haɗa da mota ƙirar Golf 3 Wagon mai lamba AJ507GWA da wata mota ƙirar Chevrolet mai zaman kanta.

Kwamandan ya alaƙanta hatsarin da sauri da gudun wuce ƙa’ida, inda ya ƙara da cewa jami’an hukumar sun wanke wurin da hatsarin ya auku tare da ƙwato Naira dubu 73,000, wayoyi bakwai, ‘power bank’ ɗaya da ƙananan jakunkuna huɗu.

“Mutane 19 ne suka mutu a hatsarin motar, wanda suka haɗa da manyan mata 10, manyan maza bakwai, yara mace ɗaya da namiji ɗaya. “Goma sha huɗu daga cikinsu sun rasa rayukansu a nan take sun haɗa da manyan mata 10, manyan maza biyu, yaro namiji ɗaya da mace ɗaya,” inji shi.

Abdullahi ya ce an miƙa gawarwakin waɗanda suka mutu da waɗanda suka jikkata zuwa asibitin koyarwa na Abubakar Tafawa Balewa da ke Bauchi domin kula da lafiyarsu da kuma tantance su.

Ya shawarci masu ababen hawa da su mutunta ƙa’idojin zirga-zirgar ababen hawa a lokacin da suke tafiyar da hanya.