Majalisar dokokin jihar Yobe ta fara zaman sauraren ra’ayoyin jama’a kan wasu ƙudirori guda biyu na kafa hukumar HISBA a jihar Yobe da sauran batutuwa da kuma hukumar bunƙasa fasahar sadarwa ta zamani.
Chiroma Buba, kakakin majalisar ne ya bayyana haka a lokacin da yake bayyana buɗe taron jin ra’ayin jama’a a ranar Alhamis a birnin Damaturu.
Ya ce an gudanar da karatun na ɗaya da na biyu ne kuma an yi ta ne a kan kwamitocin da suka dace na majalisar domin zurfafa bincike a kan majalisar.
“A kan haka ne aka gayyaci dukkan masu ruwa da tsaki a fannin addini da na yaɗa labarai da su gabatar da bayanansu don baiwa kwamitoci damar samar da dokokin da suka dace da jama’a bisa kyawawan ayyuka na ƙasa da ƙasa,” in ji shi.
KU KUMA KARANTA: Gwamnatin Yobe ta raba kayan abinci a Potiskum, don rage raɗaɗin rayuwa
Buba ya yabawa ɓangaren zartaswa na gwamnati bisa fito da muhimman ƙudirori guda biyu.
“Hukumar Hisbah, Insha’Allahu za ta kawar da jihar daga duk wata munanan ɗabi’u da fasadi.
Ya ƙara da cewa “Yayin da Hukumar Bunƙasa Fasahar Watsa Labarai za ta baiwa matasanmu masu tarin yawa damar samun ayyukan yi.”
Tun da farko, Shugaban Kwamitin Shari’a da Harkokin Addini na Majalisar, Yakubu Suleiman, ya buƙaci dukkan mahalarta taron da su bayar da tasu gudummawar sosai domin yin tasiri mai kyau kan tanade-tanaden ƙudirin.
“Bari na tabbatar muku da cewa kwamitoci da kuma majalisar gaba ɗaya za su yi nazari kan dukkan abubuwan da aka samu yayin wannan zaman da nufin shigar da su cikin ƙudirorin,” in ji shi.
