Gwamnatin Yobe ta jaddada ƙudirinta na ba da agajin gaggawa ga waɗanda ambaliyar ruwa ta shafa
Gwamnatin jihar Yobe ta jaddada ƙudirinta na kare rayuka da dukiyoyin al’umma a duk lokacin da ake fuskantar ambaliyar ruwa da sauyin yanayi, inda ta jaddada ɗaukar matakan da suka dace na ba da agajin gaggawa da kuma shirye-shiryen tunkarar na gaba.
An bayyana hakan ne yayin wani taron manema labarai da aka gudanar a ranar Litinin mai taken: “Amsar Agajin Gaggawa da Gina Juriyar Al’umma: Sabuntawar Gwamnatin Jihar Yobe kan Shirye-shiryen Tattalin Arziki da Bala’in Ambaliyar.”
Taron dai ya kasance wani dandali na faɗakar da jama’a game da afkuwar ambaliyar ruwa a jihar da kuma bayyana ƙoƙarin da ake yi na rage tasirin hakan.
Da yake jawabi a wajen taron, Dakta Mohammed Goje, Sakataren Zartarwa na Hukumar Ba da Agajin Gaggawa ta Jihar Yobe (SEMA) ya bayyana muhimman ayyukan da aka gudanar a shekarar 2025, musamman a ƙananan hukumomin Potiskum da Nangere, waɗanda ambaliyar ruwa ta shafa.
A cewarsa, gwamnati ta ba da agaji cikin gaggawa ta hanyar tura kayayyakin agaji, da bayar da tallafin jinya, da kuma aiwatar da matakan samar da ababen more rayuwa da nufin rage hadarin bala’o’i a nan gaba.
KU KUMA KARANTA: YOSEMA ta ba da tallafi ga waɗanda guguwar iska ta yiwa ta’adi a Yobe
“Waɗannan ayyukan suna aika saƙo ƙarara a ƙarƙashin jagorancin Gwamna Mai Mala Buni, jihar Yobe ta ci gaba da kasancewa mai himma, mutane sun tsaya tsayin daka, tare da jajircewa wajen kare al’ummarta, ba tare da la’akari da girman nuna bambanci ba,” in ji Goje.
Ya kuma ƙara jaddada ƙudirin SEMA na bayyana hangen nesa na jihar zuwa sakamako mai ma’ana, tare da tabbatar da cewa babu wata al’umma da aka barta baya.
Ya ƙara da cewa, “Tare da ci gaba da goyon bayan gwamnati, abokan ci gaba, da kuma jajircewar jama’armu, muna aiki tare don gina jihar Yobe.”
