Ƙasashen Waje
Gwamnatin Nijar ta karya farashin buhun shinkafa mai nauyin kilo 50
Gwamnatin mulkin soja ta Jamhuriyar Nijar ta karya farashin kuɗin buhun shinkafa mai nauyin kilogiram 50, wanda a da kudinsa yake jaka 16.500 ta CFA, a yanzu kuma za a ringa sayar da shi jaka 13.500.
Ma’aikatar Kasuwanci ta Ƙasar ce ta sanar da hakan a yayin wani taro da Ministan, Malam Asmane Saidou ya gudanar tare da ƙungiyoyin ƴan kasuwar ƙasar.
Sai dai wannan sabon farashi ya bambanta daga wannan jihar zuwa wata, inda a Yamai za a sayar da buhun a kan jaka 13.500 na CFA.
Farashin sauran jihohin sun haɗa da:
Dosso 13.675 CFA
Tawa 13.825 CFA
Maradi 13.925 CFA
Zinder 14.000 CFA
Diffa 14.375 CFA
Agadez 14.125 CFA
Atillaberi 13.650 CFA.
Gwamnatin ta ce ta ɗauki wannan matakin ne bayan ta zauna da ƴan kasuwar masu manyan motocin dakon kaya aka tattauna da su kafin ɗaukar wannan matakin.
KU KUMA KARANTA: DSS ta gargaɗi ƙungiyar ƙwadago ta Najeriya a kan shirin zanga-zangar ‘tsadar rayuwa’
Sai dai gwamnatin ta ja hankalin ƴan kasuwar da su mutunta wannan farashin da aka tsayar.
Nijar tana shigar da shinkafa daga ƙasashen waje ne inda ƴan kasuwa ke amfani da tashar ruwan Tekun Jamhuriyar Benin wajen shigar da kayayyakinsu zuwa cikin ƙasar.
To sai dai juyin mulkin da sojojin kasar sukayi a watan yulin bara ya sa Jamhuriyar Benin rufe iyakokinta da Nijar bisa umurnin Ƙungiyar Ecowas, wadda ta ƙaƙaba wa Nijar takukumai, lamarin da a baya ya haddasa ƙarancin shinkafar da sauran ƙayan masarufi, da kuma tashin farashinta a kasuwanni.
Amma rahotanni daga Nijar ɗin na cewa a yanzu abubuwa sun fara daidaita ba kamar watanni shida na baya ba.
Isra’ila ta ƙaddamar da sabbin hare-hare a kudancin Gaza
Isra’ila ta ƙaddamar da sabbin hare-hare a kudancin Gaza, inda ta tilasta wa ɗaruruwan Falasɗinawa tserewa bayan da soji suka kuma ba da umarnin ƙaurace wasu yankuna masu yawan jama’a.
KU KUMA KARANTA: Sojojin Isra’ila sun ce an yi musayar wuta da dakarun Masar
Waɗanda suka shaida lamarin sun ce an kai hari da dama a ciki da wajen birnin Khan Younis, inda aka hallaka mutane takwas kuma mutane sama da 30 suka samu raunuka, cewar wata majiyar lafiya da kuma ƙungiyar Red Crescent ta Falasɗinawa.
Farashin man fetur zai ƙaru a watan Yuli a Ghana – COPEC
Ƙungiyar Kare Haƙƙin Masu Amfani da Man Fetur a Ghana ta yi hasashen cewa akwai yiwuwar a samun ƙarin farashin man fetur a ƙasar a farkon watan Yulin 2024.
Ƙungiyar ta Chamber for Petroleum Consumers (COPEC) ta ce akwai alamu masu ƙarfi da ke nuna cewa farashin fetur da man dizel da gas zai ƙaru baki ɗaya a gidajen man da ke faɗin ƙasar, kamar yadda kamfanin watsa labarai na ƙasar Ghana ya ruwaito.
COPEC ɗin ta ce za a samu ƙarin farashin ne sakamakon yadda farashin Cedi ɗin a ƙasar ke ƙara karewa idan aka kwatanta da dalar Amurka.
COPEC ɗin ta yi hasashen cewa farashin man fetur ɗin wanda za a rinƙa sayarwa a gidan mai zai ƙaru da kashi 2.17 cikin 100, wanda hakan ke nufin zai ƙaru daga Cedi 14.17 zuwa Cedi 15.20 a duk lita.
Sai kuma farashin dizel ana sa ran ya ƙaru zuwa 15.21 a kowace lita ɗaya, sai kuma na gas ya koma tsakanin Cedi 13.24 zuwa Cedi 14.64 a duk kilo ɗaya.
KU KUMA KARANTA: Ɗan Ghana ya kafa tarihi na rungumar bishiyoyi a duniya
Ƙungiyar ta COPEC ta bayar da shawara ga gwamnatin Ghana da ta yi duk mai yiwuwa domin rage harajin da yake a kan gas ko kuma yin tallafi a farashinsa domin bayar da dama ga ‘yan ƙasar su same shi a farashi mai rahusa.
Ta kuma yi ƙira ga gwamnati da kada ta yi ƙasa a gwiwa wajen dawo da matatar mai ta Tema a kan aiki (TOR) don kaucewa ko kuma rage shigo tattacen man fetur wanda a wani lokacin ake samun gurɓatacce.
An kammala zagayen farko na zaɓen shugaban ƙasa a Iran
Daga Ibraheem El-Tafseer
Me magana da yawun Shelkwatar zaɓe ta Iran Dakta Muhsin Elsami, ya sanar da cewa, an kammala lissafi ƙuri’a Miliyan 25 na zaɓen shugaban ƙasar Iran wanda aka fara ranar juma’a.
‘Yan takara 6 ne suka tsallake matakin ƙarshe yayin da 2 suka fice saboda ra’ayin kai, ana zaɓe saura kwana 2.
Dakta Mas’ud Pezeshkian shi ne kan gaba da ƙuri’a Miliyan 10.415.991
Dakta Sa’ed Jalili ya samu ƙuri’u Miliyan 9.473298
Se kuma Dakta Qalibaf ya samu ƙuri’a Miliyan 3.383.340
Sai Ayatullah Musfata ya samu ƙuri’a 206.397.
Yanzu haka an fitar da Dakta Baqir Qalibaf da Ayatullah Musfata da suke da ƙarancin ƙuri’a, ya rage saura Dakta Jalili da Dakta Mas’ud Pezeshkian da ken gaba.
KU KUMA KARANTA: Iran ta tabbatar da mutuwar shugaban ƙasar, Ebrahim Ra’isi, a hatsarin jirgin sama
Jami’i Muhsin Elsami ya sanar da cewa za’a shiga matakin zaɓe na 2 ranar Juma’a mai zuwa inda za a kara tsakanin Dakta Jalili da Dakta Mas’ud.
Cikin su duk wanda ya samu kaso 50 ya zama shugaban ƙasar Iran, wanda zai maye gurbin Shahid Ebrahim Ra’isi wanda ya rasu sanadiyyar hatsarin jirgin Helikofta, a watan da ya gabata.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano