Labarai
Gwamnatin Bauchi za ta sasanta rikicin kan iyaka da Jigawa
Gwamnatin jihar Bauchi ta sake nanata shirinta na sasanta rikicin kan iyaka tsakanin al’umomin ƙaramar hukumar Itas-Gaɗau da ƙaramar hukumar Kafin-Hausa ta jihar Jigawa.
A wata ziyarar gano gaskiya mataimakin gwamnan jihar Auwal Mohammed Jatau wanda ya zama shugaban hukumar kula da iyakokin ƙasar ya yabawa al’ummomin kan rashin ɗaukar doka a hannunsu.
Ya ce ta hanyar ba da rahoton duk wani kutse da suka samu daga al’ummomin maƙwabta ya nuna cewa ɓangarorin biyu a shirye suke don tattaunawa da zaman lafiya.
Jatau wanda ya samu wakilcin mai taimaka masa na musamman kan harkokin iyakoki, Ahmad Garba, ya buƙaci al’ummar Itas-Gaɗau da Kafin-Hausa da su ci gaba da zaman lafiya da juna domin lamarin yana gaban hukumar kula da iyakokin ƙasa, wadda ita ce ke da alhakin yanke hukunci a tsakanin juna – rikice-rikicen kan iyaka.
KU KUMA KARANTA: Majalisar Bauchi ta buƙaci da a gyara na’urorin lantarki da suka lalace
Ya ce, “Abin farin ciki ne a gare ni in yi muku maraba da zuwa wannan taro mai matuƙar muhimmanci da ke gudana a nan birnin Itas da nufin haɗa kai don ganin al’amura ga hukumar, ta kai rahoto ga gwamnatin jihar domin ɗaukar matakin da ya dace.
“Ina so in tabbatar muku da cewa hukumar kula da iyakokin jihar na yin duk mai yiwuwa wajen aikin shata shataletalen, don haka akwai buƙatar ku ƙara haƙuri kan aikin da ke gaban hukumar ta wannan ɗabi’a,” in ji Jatau.
Ya sanar da al’ummar yankin cewa an kai ga matakin ƙarshe na shata iyaka tsakanin jihohin Bauchi da Jigawa da aka gudanar a watan Nuwambar shekarar da ta gabata kuma aka kawo ƙarshensa da ‘yan banbance-banbance inda hukumar ta jihar ta ba da shawarar a ƙara aikin filin da ra’ayi don warware matsalar da za ta ba da damar yin taron haɗin gwiwa na jami’ai (JMO), a ƙarƙashin hukumar kula da iyakoki ta ƙasa, don cimma matsaya kan matakin ƙarshe na dukkan ɓangarorin da ke taƙaddama a kan iyakar Itas/Kafin Hausa, Zaki/Kiri Kasamma, Maruta/ Gurmun da Shira/Gwaram na jihohin Bauchi da Jigawa.
Mataimakin gwamnan ya tabbatar wa masu ruwa da tsakin cewa hukumar tare da goyon bayan Gwamna Bala Mohammed za ta sauƙe nauyin da aka ɗora mata bisa himma musamman samar da hanyoyin tattaunawa domin warware duk wata matsala da ta shafi iyakokin jihar.
Masu ruwa da tsaki da suka yi jawabi a ziyarar sun amince da namijin ƙoƙarin da hukumar ke yi wajen haɗa kai da al’umma wajen magance matsalolin kan iyaka ta hanyar da ta dace.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano