Labarai
Gwamnan Zamfara ya karɓi baƙuncin ministan agaji, ya nemi ƙarin tallafi ga ‘yan gudun hijira a jihar
Daga Ibraheem El-Tafseer
Gwamnan jihar Zamfara, Alhaji Dauda Lawal, a ranar Alhamis, ya nemi ƙarin tallafi ga ‘yan gudun hijira a faɗin jihar Zamfara.
Gwamnan ya roƙi tallafin ne a lokacin da ya karɓi baƙuncin ministar harkokin jin ƙai da yaƙi da fatara, Dakta Betta Edu a jihar Zamfara.
Sanarwar da kakakin Gwamnan jihar, Sulaiman Bala Idris, ya fitar ta ce, Ministar ta ziyarci jihar Zamfara ne domin buɗewa tare da miƙa gidaje 40 da aka kammala kuma na aiki a matsayin aikin sake tsugunar da ‘yan gudun hijira.
Ya kuma ƙara da cewa Gwamnan ya raka Ministan Agaji domin ziyartar Jami’ar Tarayya ta Gusau, inda suka gana da hukumomin jami’ar da ɗaliban da aka ceto daga hannun masu garkuwa da mutane.
KU KUMA KARANTA: Sojoji sun ƙuɓutar da ɗaliban jami’a shida waɗanda ‘yan bindiga suka yi garkuwa da su a Zamfara
Sanarwar ta ƙara da cewa: “A jawabinsa a wurin buɗe taron, Gwamna Lawal ya yaba da ƙoƙarin sauran hukumomin tarayya kamar Hukumar Ba da Agajin Gaggawa ta ƙasa (NEMA) kan irin tallafin jin ƙai da taimakon da suka yi wa jihar tsawon shekaru da dama. kwanan nan.
“Ya ce sanannen abu ne cewa jihar Zamfara na fuskantar ƙalubalen tsaro, kuma za a iya magance waɗannan matsalolin ne ta hanyar ingantaccen haɗin gwiwa da gwamnatin tarayya, da jihohi maƙwabta, da duk masu ruwa da tsaki a harkokin tsaro. Fiye da kome, dole ne mu riƙa yin abin da yake daidai a lokacin da ya dace.
“Lawal ya ƙara nanata cewa, abin takaici ne a yarda cewa ‘yan fashi suna talauta mata da yara, da mayarsu marayu da zawarawa da kuma ‘yan gudun hijira musamman a yankunan karkara. Wannan ya sanya jiha a sahun gaba a jerin manyan wuraren tashe-tashen hankula da marasa galihu a Jihohin Arewa maso Yamma da sauran al’ummar ƙasar baki ɗaya.
“Game da birnin na sake tsugunar da jama’a a jihar Zamfara, ya kamata a lura da cewa tun da aka kafa wannan gwamnati, muna magance matsalar ‘yan gudun hijira a duk sassan jihar. Samar da wurin sake tsugunar da ‘yan gudun hijira a babban birnin jihar Gusau abin farin ciki ne.
“Mun yaba da ƙoƙarin da gwamnatin tarayya ke yi na rage raɗaɗin wahalhalun da al’ummarmu ke ciki.
Da take gabatar da nata jawabin, mai girma ministar harkokin jin ƙai da yaƙi da fatara, Dakta Betta Edu, ta yabawa gwamna Dauda Lawal bisa namijin ƙoƙarin da yake yi na tabbatar da jin daɗin ‘yan gudun hijira a faɗin jihar.
“Na yi matuƙar farin ciki da halartar wannan gagarumin buki na buɗewa tare da miƙawa gwamnati da al’ummar Jihar Zamfara garin sake tsugunar da jama’a a hukumance domin amfanin al’umma.
“Ina so in miƙa godiyata ga Gwamna Lawal, wanda ya tausaya wa halin da ‘yan gudun hijirar ke ciki a Jihar.
“Na ji dukkan koke-koken da gwamnatin jihar ta yi, zan miƙa saƙon ga shugaban tarayyar Najeriya da ya ƙara tallafa wa ‘yan gudun hijira a Zamfara.
“Masu cin gajiyar waɗannan gidaje kuma za su ci gajiyar tallafin kuɗaɗen da Gwamnatin Tarayya ke yi duk wata domin rage tasirin cire tallafin man fetur,” inji ta.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano