Daga Ibraheem El-Tafseer
Gwamnan Jihar Yobe Alhaji Mai Mala Buni CON, ya je Katsina yau domin yin ta’aziyya ga Alhaji Ɗahiru Barau Mangal, bisa rasuwar matarsa, Hajiya Aisha Mangal, wadda ta rasu a ƙarshen makon da ya gabata.
Gwamnan ya bayyana rasuwar marigayiyar Hajiya A’isha a matsayin babban rashi, uwa kuma mai taimakon jama’a da ‘yan uwa da jihar Katsina da sauran al’umma za su yi kewarta.
‘Ina roƙon Allah (T) ya gafarta mata kura-kuranta, ya kuma sa ta huta, ya sa Aljannatul Firdausi.
“Hakazalika ina addu’ar Allah ya jajantawa iyalan Barau Mangal, ya kuma basu ikon jure wannan babban rashi” Gwamna Buni ya yi addu’a.
Alhaji Ɗahiru Barau Mangal, hamshaƙin attajirin nan na Katsina, ya kasance yana da alaƙa da gwamnatin Buni da ci gaban jihar Yobe.
KU KUMA KARANTA: Buhari, Tinubu sun miƙa ta’aziyyar rasuwar matar Aminu Ɗantata
Ya bayar da gudumawa sosai a wajen ƙaddamar da asusun neman ilimi na jihar Yobe domin tallafawa ci gaban ilimi a jihar Yobe.
