Labarai
Guguwar iska ta lalata gonakin kaji, ta kashe tsuntsaye dubu uku a Filato
Wata mummunar guguwa ta aukawa gidan kaji na Dauda Mafala da ke Rapomol a ƙaramar hukumar Barikin Ladi a jihar Filato a ranar Asabar ɗin da ta gabata, inda ta kashe tsuntsaye sama da 3,600.
Wakilin Kamfanin Dillancin Labaran Najeriya, wanda ya ziyarci gonar a ranar Lahadi, ya gano cewa lamarin ya faru ne sakamakon mamakon ruwan sama da aka yi a yankin.
NAN ta ruwaito cewa guguwar ta lalata wasu gidajen kaji guda shida, wani ɓangare na katangar kaji da turakun wutar lantarki, da dai sauran gine-gine a gonar.
Manajan daraktan gonar, Keneth Mafala, ya shaida wa NAN cewa, gonar da aka kafa a shekarar 1976, tana da ƙarfin ɗaukar tsuntsaye 60,000.
Mista Mafala ya ce guguwar ta kuma lalata wani keji mai sarrafa kanta da ta kai dala 80,000.
“Da misalin ƙarfe 3:30 na rana a ranar Asabar, guguwar iska ta lalata gine-gine da dama a wannan gona.
KU KUMA KARANTA: Guguwa mai ƙarfi ta kashe mutane 11 a Pakistan
“Ya lalata wata gonar kaji da ke da tsuntsaye masu kwanciya 10,800. “Yayin da muke magana, mun yi asarar tsuntsaye 3,600, kuma kamar yadda kuke gani, muna ci gaba da kwashe su.
“Don haka, adadin na iya ƙaruwa da lokacin da muka gama. “Haka zalika gaba ɗaya ta lalata wani kejin kaji mai sarrafa kansa da ta kashe dala 80,000 da muka shigo da shi a shekarar 2013.
“Wannan injin yana da tsarin tattara ƙwai, tsarin ciyarwa da kuma tsarin dawo da taki,” in ji shi.
Mista Mafala ya kuma yi bayanin cewa baya ga kejin mai sarrafa kansa, jimillar ɓarnar da aka samu daga bala’in da ya kai sama da naira miliyan 250.
A martanin da mai magana da yawun ƙungiyar kiwon kaji ta Najeriya reshen Filato, Nanji Gambo ya mayar, ya bayyana lamarin a matsayin abin takaici.
Madam Gambo ta kuma ce babbar asara ce ga sana’ar kiwon kaji a jihar. Ta yi ƙira ga gwamnatin jihar da ta taimaka wa mai gonar.
Ta kuma bayyana buƙatar ganin gwamnati ta tallafa wa harkar kiwon kaji a jihar baki ɗaya.
A cewarta, sana’ar kiwon kaji na ɗaya daga cikin manyan masu ɗaukar ma’aikata a ƙasar.
“Tuni sana’ar kiwon kaji na fuskantar ƙalubale iri-iri saboda taɓarɓarewar tattalin arziƙin da ƙasar nan ke fuskanta. “Haƙiƙa cire tallafin yana magana kan manoman kaji.
“Akwai tsadar kayan abinci, rashin kasuwan ƙwai da sauran kayan kiwon kaji da sauran ƙalubale.
“A shekarar da ta gabata, alal misali, da yawa daga cikin manoman mu sun fuskanci ambaliyar ruwa da ta addabi wasu al’umma a jihar kuma babu wani tallafi da ya zo musu.
“Don haka muna ƙira ga gwamnati da ta tallafa wa wannan manomi da sauran manoman da irin wannan yanayi ya shafa domin farfaɗo da sana’o’insu.
“Ta haka ne za su koma kasuwanci tare da ba da gudummawa ga ci gaban tattalin arziƙin jihar,” in ji Misis Gambo.
Ta kuma yi ƙira ga Gwamnatin Filato da ta yi amfani da wani ɓangare na tallafin naira biliyan biyar da Gwamnatin Tarayya ta ware domin farfaɗo da sana’ar kiwon kaji da ta addabi jihar.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano