Labarai
Fusatattun matasa sun kashe mutum 1, sun ƙona gidaje 64 da babura 3 a Bauchi
Rundunar ‘yan sandan jihar Bauchi ta ce wasu fusatattun matasa sun kashe mutum ɗaya tare da ƙona gidaje 64 da babura 3 da kuma lalata dukiyoyi na miliyoyin Nairori a ƙaramar hukumar Ɓagoro da ke jihar.
Hakan na ƙunshe ne cikin wata sanarwa da mai magana da yawun rundunar, Ahmed Wakil, ya rabawa manema labarai ranar Lahadi a Bauchi.
Ya ce hakan ya faru ne a sakamakon zanga-zangar da wasu fusatattun matasa suka yi na nuna rashin amincewarsu da naɗin sarautar Hakimin ƙauyen Sang a ƙaramar hukumar.
KU KUMA KARANTA: An yankewa mahaifiya hukuncin ɗaurin rai da rai, bisa laifin kashe ‘yarta
“A ranar Asabar 15 ga Afrilu, 2023 da misalin ƙarfe 7:00 na yamma rundunar ‘yan sandan jihar Bauchi ta samu ƙiran wayar tarho kan wani rikici da ya ɓarke a yankin Ɓagoro na jihar.
“Bincike na farko ya nuna cewa rikicin ƙabilanci a ƙauyen Sang na ƙaramar hukumar Ɓagoro ya samo asali ne daga naɗin sarautar Hakimin Sang.
“Wasu fusatattun matasa masu ayyuka daban-daban sun yi zanga-zangar nuna adawa da naɗin sarautar sun kai hari kan ‘yan ƙasa da ba su ji ba ba su gani ba, yayin da matasan da suka fusata suka ƙona gidaje 64, babura 3 da kuma kadarori na miliyoyin Naira,” in ji Mista Wakil, babban sufeton ‘yan sanda.
Ya ƙara da cewa mutum ɗaya mai suna Apollo Ɗanlami mai shekaru 70 ya mutu a lamarin yayin da wata Naemiya Bature mai shekaru 65 da kuma wasu mutane suka samu raunuka sakamakon wannan ta’asa.
Kakakin ya ce jami’an ‘yan sandan da suka haɗa da tawagogin dabara, da tawagar ɗaukar matakai cikin gaggawa da kuma aikin maido da zaman lafiya cikin gaggawa suka amsa ƙiran da aka yi musu da kuma ƙoƙarinsu na shawo kan lamarin.
“Yankin yana da kwanciyar hankali a yanzu, kuma an ƙarfafa matakan tsaro a cikin ƙaramar hukumar Ɓagoro da kewaye saboda kare lafiyar ‘yan ƙasa ya kasance babban fifikon hukumar yayin da ake aiki dare da rana don ci gaba da lalacewa,” Mista Wakil yace.
A cewarsa, kwamishinan ‘yan sandan jihar, Aminu Alhassan, ya umurci DPO na Ɓagoro da ya fara gudanar da bincike na gaskiya domin bankaɗo al’amuran da suka haifar da wannan rikici.
Ya bayyana cewa an ƙara ƙaimi wajen ganin an kamo waɗanda suka aikata wannan ɗanyen aiki domin fuskantar fushin doka.
Wani sabon gini mai hawa 2 ya rushe a Legas
Wani sabon bene mai hawa biyu a Jihar Legas, ya rushe yayin da ake tsaka da mamakon ruwan sama wanda ya haddasa ambaliya a wasu sassan jihar.
Ginin ya rushe ne a lamba 12 da ke yankin Cameroun kusa da Ewenla a Mushin.
Hukumar Bayar da Agajin Gaggawa ta jihar (LASEMA), ta bayyana cewar bayan isar jami’anta wajen da lamarin ya faru, ta gano wani sabon gini mai hawa biyu ya rushe.
An ceto mutum bakwai; mata uku da maza huɗu, tuni aka kai su asibiti domin duba lafiyarsu.
KU KUMA KARANTA: Wani bene mai hawa 4 ya rufta da mutane a Abuja
Ya zuwa yanzu dai hukumar, ta ce babu wanda ya mutu a dalilin rushewar ginin.
Babban sakataren LASEMA, Dokta Olufemi Damilola Oke-Osanyintolu, ya ce ana ci gaba da gudanar aikin ceto don tabbatar da babu wanda ya maƙale a baraguzai.
Wani jami’in EFCC ya hallaka kansa a Abuja
Rahotanni sun bayyana cewar wani jami’in Hukumar Yaƙi da Masu Yi Wa Tattalin Arziƙin Ƙasa Zagon Ƙasa (EFCC), ya hallaka kansa har lahira a Abuja.
An tsinci gawar marigayin ne a gidansa da ke babban birnin tarayya.
Marigayin, wanda ba a bayyana sunansa ba, an ce ya kasance ɗaya daga cikin waɗanda suka yi kwas na 5 a makarantar horas da masu yi wa ƙasa hidima ta hukumar yaƙi da cin hanci da rashawa.
An ruwaito cewar yana da ƙwazo da himma a wajen gudanar da ayyukansa.
Wata majiya ta ce jami’in ya jima yana fama da baƙin ciki da matsalolin rayuwa kafin mutuwarsa.
Kakakin EFCC, Dele Oyewale, ya shaida wa manema labarai cewa hukumar za ta binciki musababbin da ya sanya ya kashe kansa, kuma hukumar za ta taimaka wa iyalansa.
Oyewale, ya ƙara da cewa hukumar za ta binciki wasu abubuwa da suka haɗa da matsalar taɓin hankali da kuma matsalolin iyali waɗanda ka iya sanya ma’aikacin kashe kansa.
KU KUMA KARANTA: Ana zargin wani jami’in kwastam ya kashe kansa a Abuja
Sai dai ya ce hukumar ba za ta fitar da wata sanarwa ko kuma bayyana sunan jami’in ba, har sai an kammala bincike.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano
Pingback: ‘Yan sanda sun kama mutane 7 da suka kashe direban mota | Neptune Prime Hausa