Labarai
CISLAC ta yi ƙira ga ɗaukar matakin gaggawa wurin an samu zaman lafiya a masarautar Kano
CISLAC ta yi ƙira ga ɗaukar matakin gaggawa wurin an samu zaman lafiya a masarautar Kano
Cibiyar inganta aikin majalisar da rajin yaƙi da cin hanci da rasahwa ta CISLAC, ta bayyana matuƙar damuwa ga dambarwar dake faruwa na sake maida Sarkin Kano Muhammadu Sanusi na biyu a kan karagar mulki, da kuma sauƙe Alhaji Aminu Ado Bayero.
CISLAC ta yi kashedi cewa abubuwan dake faruwa na barazanar jefa jihar Kano cikin rikici da tashin hankali, lamarin da zai kawo rashin zaman lafiya a yankin arewacin Najeriya.
Babban Daraktan CISLAC, Auwal Musa Rafsanjani, ya yi gargaɗin da kakkausar murya kan duk wani yunƙuri na amfani da lamarin wajen ayyana dokar ta-ɓaci a jihar Kano. Ya ce, “Ana kallon irin waɗannan ayyuka a matsayin rashin tunani da kuma takala wanda zai iya wargaza tarihin siyasar Kano na sama da shekaru 1,000.”
KU KUMA KARANTA:Gwamnan Kano ya ba da umarnin kama Aminu Ado Bayero
CISLAC ta lura cewa hukuncin kotu mai tattare da cece-ke-ce da jami’an tsaro suka dogara da shi ya taimaka wajen dawo da Sarki Aminu Bayero. Alƙalin da ya zartar da hukunacin yanzu haka ba shi a cikin ƙasar kana ba shi kan aikinsa.
“Halin da ake ciki ya haifar da muhimman batutuwa a kan halasci da cancantar hukuncin kotun, in ji Rafsanjani.” Dogaro da abin da CISLAC ta kwatanta da ‘umarnin kotun cin zali’ wurin tura ‘yansanda da jami’an tsaro suka mamaye jihar Kano ya yi matuƙar tada hankali da kuma rura fitina.
Sanarwar ta ci gaba da cewa, gwamnatin jihar na da hurumin nadawa da kuma tabbatar da sarakunan gargajiya, ciki har da babban Sarkin. “Rafsanjani ya jaddada cewa ba za a lamunta da duk wani yunƙuri na ƙwace wannan hurumi da kuma jefa jihar cikin rikici ba. “CISLAC ta yi imani cewa Gwamnatin Jihar Kano tana da ‘yancin shawo kan matsalolin dake addabar masarautunta kuma dole ne a mutunta wannan ‘yancin domin kaucewa faɗawa rikici.”
CISLAC ta yi ƙira ga shugaban ƙasa Bola Ahmed Tinubu da kar ya yarda da duk wani yunƙuri na ‘yan siyasa dake neman kawo cikas ga zaman lafiya da haɗin kai a jihar Kano. “Bai kamata gwamnatin tarayya ta bari a yi amfani da ita a matsayin makamin da za a cimma muradun siyasa kana a ƙara dagula zaman lafiyar jihar da yankin, Rafsanjani yana kashedi.”
A matsayinta na mai fafutukar tabbatar da dimokuraɗiyya da zaman lafiya, CISLAC ta tsaya tsayin daka wajen yin Allah wadai da duk wani nau’i na tashin hankali da cin zarafin hukumomi a jihar Kano. Ƙungiyar ta yi ƙira ga dukkan muhimman hukumomin da su ba da fifiko kan tattaunawa da neman hanyoyin da suka dace wajen magance wannan rikici.
An tuɓe wa ’yan sanda 5 kaki kan karɓar cin hanci
Rundunar ’yan sandan Najeriya ta tube wa wasu jami’an ta biyar kaki sakamakon zargin su da karɓar cin hancin kuɗi kimanin Naira miliyan uku.
Mataimakin Shugaban ’yan Sanda mai kula da Shiyya ta shida ta da ke Jihar Kuros Riba, Jonathan Towuru, ya sanar a Kalaba cewa ’yan sandan sun kwace kuɗin ne da bakin bindiga a hannun wani mai abin hawa.
A makon jiya ne aka zargi jami’an da ƙwayar kuɗin da bakin bindiga a hannun wani mutum da rundunar ta sakaya sunansa.
Yanzu haka waɗanda ake zargin an tuɓe masu kaki amma ana tsare da su ana bincike, da zarar an same su da laifi kotu za a turasu ta yanke masu hukuncin da ya dace.
KU KUMA KARANTA: ’Yan sanda za su tantance ’yan banga a Yobe
Mataimakin shugaban ’yan sandan ya ce waɗanda ake zargin su da karɓar cin hancin kuɗi Naira milyan uku daga wannun wani.
Ko a kwanan baya irin haka ta taba faruwa a kan babbar hanyar Kalaba zuwa Ikom inda aka kama wasu ’yan sanda kan karbar na goro.
Tafiya a kan hanyar na yawan zargin ’yan sanda da kula da shingen bincike a kan hanyar da yawan tatsar su kuɗi.
Ƙaramar Hukumar Kwami ta kafa kwamitin tsaro saboda rikicin manoma
A ƙoƙarinsa na kauce wa rikicin manoma da makiyaya da ke yawan faruwa a lokacin damuna, Shugaban Karamar Hukumar Kwami a Jihar Gombe, Dakta Ahmed Wali Doho, ya kafa kwamitin tsaro da sanya ido kan ɓangarorin.
Da yake zantawa da manema labarai a ofishinsa da ke garin Malam Sidi, shugaban karamar hukumar, ya bukaci manoma da su guji noma burtalolin shanu, wanda hakan ke haifar da rikici tsakaninsu da makiyaya, da ke haifar da asarar rayuka.
Su ma makiyayan ya gargade su da cewa su guji shiga gonakin manoma, saboda hakan ne ke jawo rikici idan suka cinye musu amfanin gona.
A cewarsa, lokacin girbi me aka fi samun rikicin manoma da makiyayan, saboda haka kwamitin zai ci gaba da sa ido daga yanzu har zuwa lokacin girbin don ganin ba a samu rikici ba.
KU KUMA KARANTA: Gwamna Yusuf ya amince da sayen taki na naira biliyan 5 don manoman Kano
Ya ƙara da cewa, kusancin garin Kwami da rafi ya sa ya zama wuri mai kyau don noman rani.
Don haka ya ja hankalin manoman yankin da su yi amfani da wannan damar wajen bunkasa tattalin arzikinsu.
Ya jaddada cewa noman rani na da matukar muhimmanci wajen magance matsalar karancin abinci a Najeriya.
Hakan ne ya sa suka haɗa kan matasan yankin don su fara noman rogo da zai taimaka wajen shawo kan matsalar ƙarancin abinci da rage wa manoma tsadar takin zamani.
’Yan sanda za su tantance ’yan banga a Yobe
Rundunar ’yan sandan jihar Yobe ta ƙaddamar da shirin yin gyara da kuma tantance ’yan banga domin kawar da ɓata-garin cikin
Rundunar ’yan sandan jihar Yobe ta ƙaddamar da shirin yin gyara da kuma tantance ’yan banga domin kawar da bata-gari a cikinsu.
Kwamishin ’yan sandan jihar, Garba Ahmed, ya sanar da shirin bayan an kama wasu ’yan banga uku da aikata manyan laifuka.
Ya jaddada muhimmancin sake duba ayyukan ’yan banga a jihar, duk da muhimmiyar rawar da suke takawa wajen taimaka wa jami’an tsaro a yaki da miyagun laifuka.
Ya ce yin gyaran da kuma tantancewa ya zama dole sakamakon ƙorafe-ƙorafen neman yin hakan daga jama’a.
Ya bayyana cewa jama’a sun yi ƙiran ne bayan kama wasu ’yan banga uku da laifin hada baki wajen shiga gida, sata, ƙwace da kuma sayar da kayan sata a Damaturu.
Wata sanarwa da DSP Dungus Abdul Karim, kakakin rundunar, ya fitar, ta ce wasu daga cikin ’yan banga sun kai korafi bayan faruwar lamarin.
KU KUMA KARANTA: Ƴan bindiga sun kashe mutum 12 a Kaduna, sun kai hari a ofishin ƴan sanda a Zamfara
“A ranar 27 ga watan Yuni, 2024, rundunar ta amsa kiran wani mai shago a Damaturu, wanda ya dauki ’yan banga aikin gadi, amma suka kwashe kayan shagon na makudan kudade ba tare da bayani ba.
“Bincike ya kai ga kama wasu mutane biyu da kayan sata da ake zargin sun saya ne daga wani dan banga wanda nan take aka kama shi.
“Ana shawarta jama’a da su yi taka-tsan-tsan wajen daukar masu gadi, sannan su kai rahoton ’yan banga da aka ga suna aikata laifi a bakin aikinsu.”
Sanarwar ta ci gaba da cewa, rundunar tana ɓullo da tsare-tsare don daukar bayanan ’yan banga domin sa ido kan ayyukansu.
Ta ci gaba da cewa ofisoshin ’yan sanda na yankuna da ke jihar za su jagoranci wannan aikin tantancewan domin kawar da baragurbi a cikin ’yan banga.
“Don haka ake ƙira ga jama’a da su ci gaba da tallafa wa ’yan sanda wajen jainrahoton ayyukan jami’an tsaron da ba su dace ba a hedkwatar jihar ta lamba 07068858500, ko kuma a gabatar da wasikar korafin ga kwamishinan ’yan sanda ta hanyar kakakin rundunar,” in ji sanarwar.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano