'Yansanda
Basarake ya ƙona magidanci, ya mutu har lahira a Yobe
Rundunar ‘yan sandan jihar Yobe a ranar Asabar ɗin da ta gabata ta ce ta kama wani basarake da ‘ya’yansa biyu kan kisan wani Goni Waje a ƙauyen Dako Kangarwa da ke ƙaramar hukumar Yunusari.
Kakakin rundunar ‘yan sandan jihar, Dungus Abdulkarim ya bayyana haka a wata sanarwa da ya fitar a Damaturu, ya bayyana sunayen waɗanda ake zargin Jalomi, Ciroma da Bulama.
Mista Dungus, ya ce kisan ya auku ne a ranar 7 ga watan Yuni bayan mutanen uku sun zargi Waje da yin lalata da matar Bulama, hakimin yankin kuma mahaifin Jalomi da Ciroma.
“Kamar yadda shaidun gani da ido suka bayyana, an yi wa mamacin yankan rago tare da kone shi ƙurmus daga hannun Alhaji Jalomi da Ciroma.
KU KUMA KARANTA: Ƴan bindiga sun kashe basarake sun ƙona gawarsa a Imo
“Kamar yadda aka ruwaito, lamarin ya fara ne da faɗa da ya kai ga mamacin ya yi amfani da wuƙa wajen raunata mahaifin waɗanda ake zargin,” in ji Mista Abdulkarim.
Ya ƙara da cewa daga baya Bulama ya umurci ‘ya’yansa da su bi Waje, inda suka shi ƙona shi har lahira.
Mista Abdulkarim ya ce waɗanda ake zargin uku sun miƙa kansu ga ofishin ‘yan sanda na yankin Yunusari bayan faruwar lamarin.
“Yayin da Bulama ke neman hanyoyin da zai yi wa kansa magani daga raunin da ya samu, ba shi da wani zaɓi da ya wuce ya sa ‘yan sanda su gudanar da bincike.
“Wanda aka kashe ya bayyana a matsayin wanda ake tuhuma, wanda hakan ya sa aka kama shi a ofishin ‘yan sanda na Yunusari “
Daga baya, waɗanda suka aikata wannan ɗanyen aikin sun kai rahoton kansu ga sashin Yunusari bayan kama mahaifinsu,” in ji shi.
Mista Abdulkarim ya ce an miƙa mutanen uku zuwa sashin binciken manyan laifuka domin ci gaba da bincike.
Kakakin ya ce an ajiye gawar Mista Waje a asibitin ƙwararru da ke Damaturu.
An tuɓe wa ’yan sanda 5 kaki kan karɓar cin hanci
Rundunar ’yan sandan Najeriya ta tube wa wasu jami’an ta biyar kaki sakamakon zargin su da karɓar cin hancin kuɗi kimanin Naira miliyan uku.
Mataimakin Shugaban ’yan Sanda mai kula da Shiyya ta shida ta da ke Jihar Kuros Riba, Jonathan Towuru, ya sanar a Kalaba cewa ’yan sandan sun kwace kuɗin ne da bakin bindiga a hannun wani mai abin hawa.
A makon jiya ne aka zargi jami’an da ƙwayar kuɗin da bakin bindiga a hannun wani mutum da rundunar ta sakaya sunansa.
Yanzu haka waɗanda ake zargin an tuɓe masu kaki amma ana tsare da su ana bincike, da zarar an same su da laifi kotu za a turasu ta yanke masu hukuncin da ya dace.
KU KUMA KARANTA: ’Yan sanda za su tantance ’yan banga a Yobe
Mataimakin shugaban ’yan sandan ya ce waɗanda ake zargin su da karɓar cin hancin kuɗi Naira milyan uku daga wannun wani.
Ko a kwanan baya irin haka ta taba faruwa a kan babbar hanyar Kalaba zuwa Ikom inda aka kama wasu ’yan sanda kan karbar na goro.
Tafiya a kan hanyar na yawan zargin ’yan sanda da kula da shingen bincike a kan hanyar da yawan tatsar su kuɗi.
‘Yan sanda sun kama mutum 2 da ake zargin sace mahaifiyar Rarara
Rundunar ’yan sandan Jihar Katsina ta sanar da cafke wasu mutum biyu bisa zargin hannu a garkuwa da mahaifiyar fitaccen mawaƙin siyasar nan, Dauda Kahutu Rarara.
Mai magana da yawun rundunar a Katsina, ASP Abubakar Sadiq Aliyu ya ce “muna tsare da mutum biyu kan lamarin, muna ci gaba da bincike.”
Tun farko, Kwamishinan tsaro na Jihar Katsina, Nasiru Mu’azu ya ce an sace dattijuwar ce a daren Juma’a a ƙauyen Kahutu da ke Karamar Hukumar Ɗanja.
Mu’azu ya ce waɗanda suka sace matar sun yi hakan ta hanyar bi ta bayan gida, inda suka sace ta ba tare da jami’an da ke tsaron gidan sun sani ba.
Ya kuma bayyana cewa tuni aka tura jami’an tsaro waɗanda suka bazama cikin dazuka domin bin sawun ’yan bindigar.
KU KUMA KARANTA: ‘Yan bindiga sun yi garkuwa da mahaifiyar mawaƙi Rarara
Neptune Prime Hausa ta ruwaito shaidu a kauyen sun ce da misalin karfe daya na dare ne dandazon ’yan bindiga suka kutsa gidan dattijuwar suka yi awon gaba da ita.
“A kafa suka zo, ba su yi harbi ba a lokacin da suka ka yi awon gaba da ita cikin ’yan mintoci.
“Dattijuwar ba ta bijire musu ba a lokacin da suka memi ta biyo su.
“Duk da cewa ’yan bindigar sun samu wasu mutane a gidan, amma mahaifiyar Rarara kaɗai suka ɗauka.
“Babu wani yunƙuri da aka yi na tunkarar ’yan bindigar a lokacin da suke tafiya da ita saboda bindigogin da suke ɗauke da su,” in ji wani mazaunin ƙauyen na Kahutu.
Ya ce, “Watakila maharan sun bar baburansu ne daga nesa suka tako zuwa cikin ƙauyen a kafa.
“Muna rokon Allah Ya kuɓutar da ita cikin koshin lafiya domin tana taimaka mana sosai a wannan ƙauyen.
“Danta Rarara mai yawan taimakon al’umma ne, kuma ya kawo mana abubuwan ci gaba sosai a garinmu,” in ji shi.
‘Yan sanda sun kama kawali na ’yan bindiga
Daga Muhammad Kukuri
Wani wanda yake kai wa ’yan bindiga karuwai domin yin lalata da su ya shiga hannun jami’an tsaro.
’Yan sanda sun bayyana cewa kawalin ya kuma ƙware wajen yin safarar makamai ga ƙungiyar jagoran ’yan bindiga mai suna Arɗo, wanda ake nema ruwa a jallo a yankin Kagarko da ke Jihar Kaduna.
An kuma gano cewa mutumin wanda yake harkar hada-hadar tura kuɗi ta PoS, shi ke kai wa iyalan ’yan bindiga kuɗaɗe a yankin na Kagarko.
Dubun kawalin ta cika ne a yayin wani samamen haɗin gwiwa da ’yan sanda suka gudanar a yankin.
Kwamishinan ’Yan Sandan Birnin Tarayya, ya sanar ranar Talata cewa wanda ake zargin ya shaida musu cewa shi ke tsara yadda ake kai wa ’yan bindiga karuwai da miyagun ƙwayoyi da ma’aikatan lafiya a duk lokacin da suke buƙata.
KU KUMA KARANTA: Ƴan sanda a Kano sun kai mutanen da ake zargi da sayar da dala ba bisa ƙa’ida ba kotu
“Ya kuma amsa cewa yana yin dakon kuɗi tare da rabawa ga iyalan ’yan bindiga.
“A cewarsa, kuɗaɗen da ya raba wa iyalan ’yan bindiga sun haura Naira miliyan ashirin,” in ji kwamishinan ’yan sandan.
Igwe ya ce wanda ake zargin ya tabbatar musu cewa ’yan bindigar da ke ƙarƙashin Ardo sun kai 15 kowannensu da bindiga ƙirar AK-47.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano