An kama sojojin bogi guda biyar a jihar Legas

Rundunar sojojin Najeriya Brigade ta 9, da ke Ikeja Cantonment a jihar Legas, ta kama wasu mutane biyar da ke yin sojin bogi. 

Waɗanda ake zargin da aka miƙa wa ‘yan sanda domin ci gaba da bincike da gurfanar da su a gaban Kotu, an ce an kama su a lokuta daban-daban a yankunan Ojodu Berger, Ikorodu, Ogba, da Ikeja a Legas.

KU KUMA KARANTA: An cafke Kwamishinan ‘yan sanda na bogi a Legas

Waɗanda ake zargin dai sun haɗa da Johnson Ayemoba, Salami Olamilekan, Mumammed Bilyaminu, Abijo Taofeek, da Adewale Quadri, a cewar daraktan hulɗa da jama’a na rundunar ta 9, Manjo Augustine Kolawole, an kama su ne a wani sintiri na yau da kullum da rundunar ta Brigade ta yi.

Tuni rundunar ‘yan sandan jihar Legas ta fara bincike domin gurfanar da sojojin bogi da soji suka kama suka miƙa mata.