An kama malaman bogi a jami’ar Bayero da ke Kano

An kama malaman bogi a jami’ar Bayero da ke Kano

Daga Ibraheem El-Tafseer

A wani lamari mai matuƙar tayar da hankali a Jami’ar Bayero Kano (BUK) Jami’an tsaro sun kama wasu mutane biyu da suke ikirarin su malamai ne tare da tilasta wa ɗalibai masu matakin karatun aji ɗaya (100 level) sayen litattafai marasa inganci.

Malaman bogin waɗanda aka bayyana sunayensu da David Iluebe daga jihar Edo da kuma Chike E. Eke daga jihar Delta, an kama su ne suna sayar da litattafai tare da yi wa ɗaliban barazana da za a hukunta su idan ba su saya ba.

Malaman bogin waɗanda sun bayyana ƙarara ‘yan damfara ne, an kama su ne a tsangayar fasaha da ƙere-ƙere (Engineering).

Sun damfari ɗalibai ta hanyar gabatar da jerin wasu litattafai guda huɗu na Turanci, Ƙididdiga, Jama’ar Najeriya da Al’adu, da lissafi.

KU KUMA KARANTA: Gwamnatin tarayya za ta fara farautar ma’aikatan da suke da shaidar karatun bogi

An bankaɗo makircin na su ne lokacin da jami’an tsaro masu sa ido, da ke aiki kan wani rahoto, suka kama su a ranar 25 ga Yuli, 2024.

A lokacin da Neptune Prime ta tuntuɓi jami’in hulɗa da manema labarai na BUK, Lamara Garba, ya bayyana cewa waɗanda ake zargin sun yarda cewa matsalar kuɗi ce ta sa su ke kwaikwayar malamai da sayar da litattafai na satar fasaha.

Wannan lamari dai shi ne yunƙurinsu na biyu da aka sani, inda a baya suka kai hari a Kano State Polytechnic a farkon wannan shekarar.

Littattafan da aka samu a hannunsu ba su da inganci.

Bala Abdullahi, sakataren yaɗa labarai na muƙaddashin magatakardar, ya jaddada muhimmancin lamarin a wata sanarwa da ya raba wa manema labarai. Ya kuma tabbatar wa da jama’a cewa jami’ar na ɗaukar matakai na hana aukuwar irin wannan lamari, da suka haɗa da ƙara sanya ido da kuma wayar da kan ɗalibai.

“Hukumomin Jami’ar Bayero da ke Kano, na son sanar da ɗalibai da sauran jama’a da su yi hattara da irin waɗannan masu Malaman bogin, ‘yan damfara,” in ji Abdullahi.

“An tsaurara matakan sa ido domin daƙile sake aukuwar irin wannan mummunan lamari.”

An miƙa waɗanda ake zargin ga ‘yan sanda domin gudanar da bincike da gurfanar da su gaban ƙuliya.

Duk ƙoƙarin jin ta bakin jami’an ‘yan sanda a Kano ya ci tura, har ya zuwa haɗa wannan rahoto.