Hisbah a Kano, ta kama wasu masoya biyu da suka ɗaura aure a gidan cin abinci
Daga Jamilu Lawan Yakasai
Hukumar Hisbah ta jihar Kano ta cafke wani mutum da budurwar sa bisa daura aurensu a gidan cin abinci na Banana da ke titin gidan zoo a Kano.
Mataimakin babban kwamandan hukumar, Dakta Mujahideen Abubakar, ya tabbatar da kamen ga jaridar PUNCH Online a yau Alhamis, inda ya bayyana cewa jami’an Hisbah sun kai farmaki gidan abincin ne a daren jiya Larabar, biyo bayan samun bayanan sirri.
KU KUMA KARANTA:Hisbah ta fara kwashe yara da ke gararamba a tituna
“Abin takaici ne a gaya muku cewa abokan mutumin ne suka gudanar da daurin auren a gidan abinci ba tare da amincewar iyayen ma’auratan ba,” in ji shi.
Ya yi gargadin cewa hukumar ba za ta nade hannunta ta barin wasu abubuwan da ba a so su ci gaba da keta shari’a a jihar Kano ba.
A cewarsa, tun daga lokacin ne hukumar ta kaddamar da farautar dukkan baki da suka halarci haramtaccen daurin auren.
“Mun kama ma’auratan. Muna bin abokan angon da suka gudu daga gidan abincin bayan da jami’an mu suka afkawa wurin,” ya kara da cewa.
Mataimakin kwamandan ya ce ma’auratan sun saba wa dukkanin sharuddan daurin aure, wanda hakan ya saba wa Shari’a.
