Labarai
Ƴan sanda a Kano sun kai mutanen da ake zargi da sayar da dala ba bisa ƙa’ida ba kotu
Rundunar ƴan sandan jihar Kano da ke Najeriya ta ce ta gurfanar da wasu mutane da ta kama bisa zargin sayar da dalar Amurka ba bisa ƙa’ida ba a gaban kotu.
Mai magana da yawun rundunar, Abdullahi Haruna Kiyawa ne ya bayyana haka a wata sanarwa da ya fitar ranar Litinin da daddare.
Ya ce rundunarsu tare da haɗin gwiwar hukumar EFCC, mai yaƙi a masu yi wa tattalin arzikin Najeriya ta’annati da hukumar Kwastam sun kai samame a wasu wurare da ake hada-hadar dala ba bisa ƙa’ida ba a cikin birnin Kano a makon jiya inda suka kama mutum talatin da ɗaya.
A cewarsa an kai samamen ne a ” Wappa Bureau De Change, Ƙaramar hukumar Fagge da Bayan ofishin CBN da ke Ƙaramar hukumar Nassarawa da Central Hotel, Bompai Road, Ƙaramar hukumar Nassarawa da Ashton Road da Filin Jirgin saman Ƙasa da Ƙasa na Mallam Aminu Kano (MAKIA) da Ƙofar Ruwa Motor Park, Ƙaramar hukumar Dala da Kasuwar Hatsi ta Dawanau a Ƙaramar hukumar Dawakin Tofa.”
KU KUMA KARANTA: EFCC ta tsare masu sayar da sabbin takardun kuɗi a Kano
Abdullahi Haruna Kiyawa ya ce cikin mutanen da aka kama an sallami mutum 22 saboda babu wata shaida da ta nuna sun aikata laifi, yana mai cewa an kama mutum tara da kuɗaɗen ƙasashe daban-daban da suka haɗa da dalar Amurka da naira da kuɗin ƙasar Masar da kuɗin ƙasar Habasha da sauransu.
“An gurfanar da mutum tara da ake zargi gaban kotu mai lamba 70 da ke Normandsland a Kano domin su fuskanci hukunci,” in ji Kiyawa.
A makon jiya ne gwamnatin Najeriya ta ce jami’an tsaron ƙasar za su haɗa gwiwa domin soma yin dirar mikiya kan mutanen da ke sanya dala ta yi tsada a ƙoƙarinta na magance matsalolin da ke kawo tarnaƙi ga tattalin arzikin ƙasar.
NAFDAC ta rufe shaguna 100 A Enugu
Hukumar Kula da Ingancin Abinci da Magunguna ta Ƙasa (NAFDAC), ta rufe shaguna kusan 100 a babbar kasuwar Ogbete ta Jihar Enugu, bisa zargin sayar da wasu abubuwan sha na jabu.
Daraktan NAFDAC, Martins Iluyomade a yankin Kudu maso Gabas, ya ce hukumar ta ɗauki matakin ne bayan wani samame da ta kai a ranar Litinin.
A yayin samamen jami’an hukumar NAFDAC, sun cafke wata babbar mota ɗauke da kayayyakin maye tare da cafke wasu ‘yan kasuwa huɗu da ake zargi da hannu wajen sayar da jabun abubuwan sha.
Iluyomade, wanda masanin haɗa magunguna ne, ya nanata cewa matakin ya zama dole domin kare masu amfani da ire-iren kayayyakin .
Ya ce waɗanda ake zargin a halin yanzu ana kan bincikensu kuma za su fuskanci tuhuma a gaban kotu bayan kammala binciken.
KU KUMA KARANTA: NAFDAC ta haramta amfani da maganin tari na yara na kamfanin J&J
Har wa yau, ya nanata ƙudurin NAFDAC na kawar da kayayyaki marasa inganci, da jabun abubuwan ci da sha, da gurɓatattun kayayyaki a kasuwa.
Ya ƙara da cewa, an gudanar da binciken ne tare da haɗin gwiwar hukumomin tsaro.
A gefe guda kuma, ya bayyana muhimmancin aikin hukumar na tabbatar da lafiyar al’umma.
Ɗangote ya soki sabon tsarin gwamnatin Tinubu
Hamshaƙin Attajiri kuma Kamfanonin Ɗangote, Alhaji Aliko Ɗangote, ya yi kakkausar suka kan ƙarin kuɗin ruwa da babban Bankin Najeriya CBN ya yi wanda ya kai kusan kashi 30 cikin ɗari.
Da yake jawabi a ɗakin taro na Banquet dake birnin tarayya Abuja, yayin buɗe taron kwanaki uku da ƙungiyar masana’antun Najeriya (MAN) ta shirya, Ɗangote ya bayyana illolin da sabon tsarin kuɗin ruwan zai haifarwa wajen rage samar da ayyukan yi da kuma bunƙasar kamfanoni a ɓangaren masana’antu.
Ɗangote ya jaddada cewa idan aka samu kuɗin ruwa na kashi 30 cikin 100, ba zai yiwu a samar da ayyukan yi ko kuma bunƙasa masana’antu sosai ba.
KU KUMA KARANTA: Gobara ta tashi a matatar man Ɗangote
Ya buƙaci gwamnati da ta aiwatar da sabbin tsare-tsare da zasu bayar da kariya da raya masana’antu na cikin gida, yana mai nuni da cewa manyan ƙasashen yammaci da gabashin duniya suna kare masana’antunsu sosai don tabbatar da ci gaba da yin takara ragowar kamfanonin ƙetare
“Babu wanda zai iya samar da ayyukan yi da kuɗin ruwa na kashi 30%. Babu wani ci gaba da zai samu,” in ji Ɗangote.
Ya kuma yi gargaɗi game da illolin dogaro da shigo da kayayyaki, inda ya kwatanta shi da shigo da talauci da fitar da ayyukan yi zuwa ƙasashen waje.
Kana ya jaddada mahimmancin samar da bashin kuɗaɗe masu rahusar kuɗin ruwa don samun ci gaba, sannan ya danganta rashin kariyar masana’antu da tabarbarewar tsaro, da ƴan fashi, da garkuwa da mutane, da talauci a ƙasar nan.
An tuɓe wa ’yan sanda 5 kaki kan karɓar cin hanci
Rundunar ’yan sandan Najeriya ta tube wa wasu jami’an ta biyar kaki sakamakon zargin su da karɓar cin hancin kuɗi kimanin Naira miliyan uku.
Mataimakin Shugaban ’yan Sanda mai kula da Shiyya ta shida ta da ke Jihar Kuros Riba, Jonathan Towuru, ya sanar a Kalaba cewa ’yan sandan sun kwace kuɗin ne da bakin bindiga a hannun wani mai abin hawa.
A makon jiya ne aka zargi jami’an da ƙwayar kuɗin da bakin bindiga a hannun wani mutum da rundunar ta sakaya sunansa.
Yanzu haka waɗanda ake zargin an tuɓe masu kaki amma ana tsare da su ana bincike, da zarar an same su da laifi kotu za a turasu ta yanke masu hukuncin da ya dace.
KU KUMA KARANTA: ’Yan sanda za su tantance ’yan banga a Yobe
Mataimakin shugaban ’yan sandan ya ce waɗanda ake zargin su da karɓar cin hancin kuɗi Naira milyan uku daga wannun wani.
Ko a kwanan baya irin haka ta taba faruwa a kan babbar hanyar Kalaba zuwa Ikom inda aka kama wasu ’yan sanda kan karbar na goro.
Tafiya a kan hanyar na yawan zargin ’yan sanda da kula da shingen bincike a kan hanyar da yawan tatsar su kuɗi.
-
Kotu1 year agoKotu tayi watsi da ƙarar APC game da zaɓen Abba Gida Gida
-
Labarai9 months agoDalilin da ya sa na saka wa matata sasari – Wani magidanci a Potiskum
-
Ƙasashen Waje1 year agoƊaliban Najeriya a Sudan sun nemi a kwaso su daga ƙasar
-
Labarai1 year ago‘Yan banga sun kama wani mutum da ke yunƙurin sace yarinya a Kano