An kama wani bakanike mai shekara 25 yana ƙoƙarin sayar da motar wani mutum da ya ba shi gyara.
Kakakin ’yan sandan Jihar Legas, SP Benjamin Hundeyin, ya ce bayan karɓar motar daga hannun mai ita don gyara, sai bakaniken ya nufi kasuwa zai sayar.
A cewar Hundeyin, bayan samun sahihan bayanai an kama bakaniken da wata mota ƙirar Toyota Camry mara lamba.
Hundeyin ya ƙara da cewa wanda ake zargin zai fuskanci shari’a da zarar an kammala bincike a kansa.
Ya shawarci masu motoci da su yi taka-tsan-tsan wajen bayar da motocinsu ga amintattun bakanikai.
