Harin da Isra’ila ta kai a Cocin Saint Porphyrius Greek Orthodox a Gaza ya kashe mata a ƙalla biyu sannan ya jikkata fararen-hula da dama, kamar yadda kamfanin dillancin labarai na Falasɗinu (WAFA) ya rawaito.
Ma’ikatar Harkokin Cikin Gida ta Falasɗinu ta ce mutane da dama sun mutu yayin da wasu suka jikkata sakamakon harin, wanda ta bayyana a matsayin “sabon kisan kiyashi”.
Ma’aikatar ta ƙara da cewa mutane da dama da hare-haren Isra’ila suka kora daga gidajensu ne suke samun mafaka a cocin lokacin da jiragen yaƙin Isra’ila suka kai harin.
Mutane da dama “sun yi shahada yayin da wasu suka jikkata” a harin da Isra’ila ta kai cocin, in ji ma’aikatar.
KU KUMA KARANTA: Iran ta gargaɗi Isra’ila kan ci gaba da kai hari kan Falasɗinawa
Ganau sun ce harin ya lalata ƙofar shiga cocin da wasu gine-gine da ke daura da shi, suna masu ƙara wa da cewa an garzaya da waɗanda suka jikkata zuwa asibiti.
Abu Selmia, darakta janar na Asibitin Shifa, ya ce an jikkata gomman mutane a harin da Isra’ila ta kai Cocin Saint Porphyrios ko da yake bai bayyana takamaiman yawan mutanen da suka mutu ba da waɗanda gini ya rufta a kansu ba.
Wani da ya tsira daga harin ya shaida wa gidan talabijin na Al Jazeera Arabic cewa sojojin Isra’ila ba su aika musu da gargaɗin fice wa daga cocin ba kafin kai harin.
